سری نگر : مقبوضہ کشمیر میں قابض بھارتی فوج کی جارحیت بدستور جاری ہے اور وادی میں لاک ڈاؤن کو 170 روز مکمل ہوچکے ہیں، بھارتی فورسز نے ایک گھر دھماکے سے اڑادیا۔
تفصیلات کے مطابق آرٹیکل370کی منسوخی کے بعد مقبوضہ کشمیر میں کرفیو کا 170 واں روز ہے، وادی میں اسکول، کالجز اور تجارتی مراکز بند ہیں، مقبوضہ وادی میں نظام زندگی پوری طرح مفلوج ہوچکا ہے، انٹرنیٹ،موبائل سروس بھی بدستور معطل ہیں۔
قابض بھارتی فوج نے کشمیریوں کے لیے سانس لینا بھی مشکل کردیا ہے، وادی میں کھانے پینے کی چیزوں، ادویات اور دیگر ضرورت کی اشیاء کی شدید قلت پیدا ہوگئی ہے، دودھ بچوں کی خوراک، ادویات سب ختم ہو چکا ہے۔
کشمیرمیڈیا سروس کے مطابق شوپیاں ودیگرعلاقوں میں بھارتی فورسز کا نام نہاد آپریشن جاری ہے، متعدد نوجوانوں کو گرفتار کرکے نامعلوم مقام پر منتقل کیا جارہا ہے، بھارتی فورسز نے ایک گھر کو دھماکے سے اڑادیا۔
مقبوضہ کشمیر میں لاک ڈاؤن کے باعث کشمیریوں کو شدید مشکلات کا سامنا ہے۔ کرفیو اور پابندیوں کے باعث اب تک مقامی معیشت کو ایک ارب ڈالر کا نقصان ہوچکا ہے جبکہ ہزاروں لوگ بے روزگار ہوچکے ہیں۔
کشمیر میڈیا سروس کے مطابق کشمیری رہنماؤں، نوجوانوں سمیت بچے بھی جیلوں میں قید ہیں، 4 ماہ سے کشمیریوں کو نماز جمعہ مساجد میں ادا کرنے نہیں دی جا رہی۔
0
20
