اسلام آباد: وزیرخارجہ شاہ محمود قریشی کا کہنا ہے کہ مقبوضہ جموں وکشمیر میں کرفیو کو 100دن گزر چکے ہیں، مودی سرکار نے 80لاکھ نہتے کشمیریوں کو محصور بنا رکھا ہے، مظلوم کشمیری بھارتی جبرواستبداد کی چکی میں پس رہے ہیں۔
تفصیلات کے مطابق مقبوضہ جموں وکشمیر کےحوالے سے وزیرخارجہ کا خصوصی پیغام میں کہنا تھا کہ معصوم بچوں اور عورتوں کو تشدد کا نشانہ بنایا جارہا ہے، خوراک اور دواؤں تک رسائی نہیں، موت کے سائے منڈلا رہے ہیں، پاکستان محبتوں کی راہداریاں کھول رہا ہے، لیکن مودی کی جارحیت برقرار ہے۔
انہوں نے کہا کہ بھارتی سرکار مقبوضہ جموں وکشمیر میں جمعے اور نمازعید پر پابندیاں لگا رہی ہے، محرم الحرام اور میلادالنبیﷺ کے جلوس تک نہیں نکلنے دیے گئے، عالمی برادری اور تنظیموں کو آگے بڑھ کر مؤثر اقدامات کرنے ہوں گے۔
شاہ محمود کا مزید کہنا تھا کہ صعوبتیں برداشت کرنے والے نہتے کشمیریوں کو سلام پیش کرتا ہوں، یقین دلاتا ہوں پاکستان کشمیری بھائیوں کی حمایت جاری رکھے گا۔
خیال رہے کہ مقبوضہ کشمیر میں قابض بھارتی فوج کی جارحیت بدستور جاری ہے اور وادی میں لاک ڈاؤن کو 100 روز مکمل ہوچکے ہیں، کشمیری روز مرہ کی ضروری اشیا خریدنے سے بھی قاصر ہیں، دودھ بچوں کی خوراک، ادویات سب ختم ہو چکا ہے۔
علی گیلانی کا وزیراعظم کے نام خط، خصوصی شکریہ ادا کیا
آرٹیکل 370 کی منسوخی کے بعد مقبوضہ کشمیر میں کرفیو کا 100 واں روز ہے، وادی میں اسکول، کالجز اور تجارتی مراکز بند ہیں، مقبوضہ وادی میں نظام زندگی پوری طرح مفلوج ہوچکا ہے۔
قابض بھارتی فوج نے کشمیریوں کے لیے سانس لینا بھی مشکل کردیا ہے، وادی میں کھانے پینے کی چیزوں، ادویات اور دیگر ضرورت کی اشیاء کی شدید قلت پیدا ہوگئی ہے۔
