لاڑکانہ : دریائے سندھ میں مسافروں سے بھری کشتی الٹنے کے بعد ایک اورشخص کی لاش نکال لی گئی، ہلاکتوں کی تعداد چھ ہوگئی، مزید لوگوں کی تلاش کے لئےریسکیو آپریشن تاحال جاری ہے۔
تفصیلات کے مطابق لاڑکانہ فتح پور کے قریب دریائے سندھ میں کشتی حادثے کے بعد ڈوبنے والے افراد کو بچانے کیلئے امدادی کارروائیاں جاری ہیں۔
ریسکیو ٹیم نے ایک اور شخص کی لاش برآمد کرلی جس کے بعد ہلاک ہونے والے افراد کی تعداد چھ ہوگئی ہے۔ کشتی حادثہ گزشتہ روز پیش آیا تھا۔
مذکورہ افراد درگاہ محبن پیر جارہے تھے، کشتی میں خواتین اور بچوں سمیت چالیس سے زائد افراد سوار تھے جس میں سے بائیس افراد کو فوری ریسکیو کر کے بچا لیا گیا تھا تاہم کچھ لوگوں نے تیر کر اپنی جانیں بچائیں۔
مزید پڑھیں : دریائے سندھ میں کشتی الٹ گئی، 40 افراد سوار، 22 کو بچالیا گیا
ڈپٹی کمشنر لاڑکانہ کا کہنا ہے کہ لاپتا افراد کو تلاش کرنے کیلئے کوششیں جاری ہیں لیکن رات کے اندھیرے میں امدادی کارروائیوں میں مشکلات کا سامنا کرنا پڑا۔
