ایوان صنعت و تجارت کراچی نے گیس اور بجلی کی قیمتوں میں اضافے کو ناقابلِ برداشت قرار دیتے ہوئے تشویش کا اظہار کیا ہے۔
تفصیلات کے مطابق کے سی سی آئی کے صدر افتخار احمد شیخ کا کہنا ہے گیس اور بجلی کے نرخوں میں فوری کمی نہ کی گئی تو ایس آئی ایف سی کے تمام اقدامات ضائع ہوجائیں گے۔
افتخار احمد کا کہنا تھا کہ گیس اور بجلی کے زائد ٹیرف سے جلد ہی ہزاروں بے روزگار سڑکوں پر نکل آئیں گے اس سے کراچی ہی نہیں پورے ملک میں سیکڑوں صنعتی یونٹس بند ہو گئے ہیں۔
کے سی سی آئی کے صدر کا کہنا تھا کہ حکومتی پالیسی ساز ریلیف کے بجائے تشویشناک صورتحال پر کوئی توجہ نہیں دے رہے، پڑوسی ممالک ہمیں اپنے خصوصی اقتصادی زونز میں یونٹ قائم کرنے کی پیشکش کررہے ہیں اور دس سال کے لیے توانائی کے نرخوں کو برقرار رکھنے کی ضمانت بھی دے رہے ہیں۔
انہوں نے مزید کہا کہ اگر صورتحال پر توجہ نہ دی گئی تو صنعت کار پاکستان چھوڑ دیں گے اور انہیں وطن واپس لانا ناممکن ہوگا۔
