The news is by your side.

Advertisement

لمبی چونچ والا “کھلاڑی” پرندہ

یہ دنیا عجائباتِ قدرت سے سجی ہوئی ہے جن کا ہم نظّارہ کرتے رہتے ہیں، لیکن قدرت کے کئی شاہکار اور روئے زمین کا بہت سا حُسن شاید آج بھی انسانی آنکھ سے مخفی ہے۔ ایک طرف ہماری زمین سبزہ و گل اور قسم قسم کے نباتات سے معمور ہے اور دوسری طرف رنگ برنگے چرند پرند ہیں جو دنیا کا حُسن بڑھاتے ہیں۔

اگر صرف پرندوں کی بات کی جائے تو ان کی لاتعداد اقسام ہیں جنھیں قدرت نے بے شمار رنگوں سے سجایا ہے۔

ایشیا سمیت دنیا کے مختلف خطوں میں پرندوں کی ان گنت اقسام پائی جاتی ہیں جن میں خوش رنگ اور سریلی آواز والے چھوٹے بڑے پرندے شامل ہیں۔ ہم آج آپ کو ایک ایسے پرندے کے بارے میں بتا رہے ہیں جسے جنوبی میکسیکو، وینزویلا اور کولمبیا کے جنگلات میں چہکتا اور اڑان بھرتا دیکھا سکتا ہے۔

اس خوب صورت پرندے کا نام keel-billed tucan ہے۔ اس کی خاص پہچان اس کی رنگ برنگی اور لمبی چونچ ہے جسے دیکھنے پر لگتا ہے کہ یہ نسبتا بھاری ہو گی اور شاید پرندے کو اسے سنبھالنا مشکل ہوتا ہو گا، لیکن ایسا کچھ نہیں ہے۔ دراصل اس چونچ کو قدرت نے ایک خاص قسم کے پروٹین سے بنایا ہے جو ہلکا، مگر سخت ہوتا ہے۔ اس کی گردن سے سینے تک بڑا زرد دھبہ ہوتا ہے جب کہ باقی جسم کالے رنگ کے پروں سے ڈھکا ہوتا ہے۔ اس پرندے کی مادہ عام طور پر ایک سے چار انڈے دیتی ہے اور انھیں‌ 15 سے 20 دن تک سینکتی ہے۔

یہ خوب صورت پرندہ زیادہ تر گروہ کی شکل میں رہتا ہے۔ اسے تنہائی پسند نہیں‌ اور یہ اپنے ماحول میں مل جل کر رہنے والا پرندہ ہے۔ جنگلی حیات کے ماہرین نے اس پرندے سے متعلق تحقیق کے دوران جانا کہ keel-billed tucan آپس میں کھیلتے بھی ہیں۔ ان کا کھیل یہ ہے کہ ایک پرندہ کسی بیج کو اپنی چونچ میں ڈالنے کے بعد مخصوص انداز سے اچھالتا ہے اور اس کا ساتھی پرندہ اڑان بھر کر اسے دبوچ لیتا ہے۔

مختلف نباتات کے بیج، پھلوں کے علاوہ چھوٹے حشرات اور کیڑے مکوڑے اس کی خوراک بنتے ہیں۔ اکثر یہ دوسرے پرندوں کے انڈے بھی ہڑپ کر جاتے ہیں۔

Comments

یہ بھی پڑھیں