The news is by your side.

افطار کے لیے مزیدار قیمے کی کچوریاں بنائیں

ماہ رمضان میں افطار میں ایسی چیزیں کھانی ضروری ہیں جو ذائقہ دار بھی ہوں اور غذائیت بخش بھی تاکہ دن بھر کی توانائی کی کمی کو پورا کیا جاسکے۔

اسی لیے آج ہم آپ کو مزیدار قیمے کی کچوریاں بنانے کی ترکیب بتا رہے ہیں۔

اجزا

قیمہ: آدھا کلو

پیاز آملیٹ کی طرح کٹی ہوئی: 2 عدد درمیانی

ادرک لہسن پسا ہوا: 1 کھانے کا چمچ

لال مرچ پسی ہوئی: 1 چائے کا چمچ

ثابت دھنیا: 1 کھانے کا چمچ

کالی مرچ پسی ہوئی: آدھا چائے کا چمچ

سفید زیرہ: 1 چائے کا چمچ

نمک: حسب ذائقہ

ہری مرچیں باریک کٹی ہوئی: 3 سے 4 عدد

ہرا دھنیا باریک کٹا ہوا: 1 گٹھی

لیموں کا رس: 2 کھانے کے چمچ

میدہ: 1 کلو

میٹھا سوڈا: 1 چائے کا چمچ

اجوائن: آدھا چائے کا چمچ

گھی: تلنے کے لیے

ترکیب

سب سے پہلے میدے میں نمک٬ میٹھا سوڈا، اجوائن اور 4 کھانے کے چمچ گھی ڈال کر 8 سے 10 منٹ تک اچھی طرح گوندھیں، پھر ململ کے گیلے کپڑے میں لپیٹ کر 10 سے 15 منٹ کے لیے رکھ دیں۔

دیگچی میں ایک کھانے کا چمچ گھی درمیانی آنچ پر 2 سے 3 منٹ تک گرم کریں، قیمہ٬ ادرک لہسن٬ کالی مرچ اور لال مرچ ڈال کر اتنی دیر پکائیں کہ قیمے کا پانی خشک ہو جائے۔

اب ثابت دھنیا اور زیرہ ڈال کر 2 سے 3 منٹ بھون لیں۔

چولہے سے اتار کر اس میں پیاز٬ ہری مرچیں٬ ہرا دھنیا اور لیموں کا رس ملا لیں اور ٹھنڈا ہونے کے لیے رکھ دیں۔

کچوریوں کے لیے آٹے کے پیڑے بنا لیں اور ہاتھ کو گیلا کر کے پیڑے کو ذرا سا پھیلا لیں، ہر پیڑے میں ایک ایک چمچ قیمہ بھر کر پیڑے کو اچھی طرح بند کریں اور 10 سے 15 منٹ کے لیے فریج میں رکھ دیں۔

کڑاہی میں گھی کو درمیانی آنچ پر 3 سے 5 منٹ گرم کریں، دوبارہ ہاتھ کو گیلا کر کے پیڑے کو ہتھیلی پر رکھ کر ہلکا سا دبائیں۔

گرم گھی میں سنہرا ہونے تک ڈیپ فرائی کریں۔

کچوریوں کو ٹشو پیپر یا خاکی کاغذ پر نکال کر کیچپ اور چٹنی کے ساتھ گرما گرم سرو کریں۔

Comments

یہ بھی پڑھیں