کےالیکٹرک کے ترجمان نے کہا ہے کہ دھابیجی پمپنگ اسٹیشن میں بجلی کی فراہمی میں تعطل زیر زمین کیبل فالٹ کے باعث پیش آیا۔
دھابیجی پمپنگ اسٹیشن پاور سپلائی کے حوالے سے اپڈیٹ دیتے ہوئے ترجمان کےالیکٹرک نے بتایا کہ دھابیجی کے علاقے میں بارش کا پانی کھڑا ہونے کے باعث فالٹ کی درستگی میں دشواری کا سامنا ہے۔
کےالیکٹرک کے ترجمان نے مزید بتایا کہ علاقے میں پانی اترتے ہی کام مکمل کر کے سپلائی بحال کر دی جائے گی۔
انھوں نے کہا کہ کےالیکٹرک کی ٹیمیں دھابیجی کے علاقے میں موجود ہیں اور واٹر بورڈ کی انتظامیہ سے مسلسل رابطے میں ہیں۔
دریں اثنا دھابیجی پمپنگ اسٹیشن پر بریک ڈاؤن کے نتیجے میں 46 گھنٹے بعد بھی فالٹ درست نہیں کیا جا سکا ہے، بجلی کے بریک ڈاؤن سے کےتھری پمپ ہاؤس کے 2 پمپ بند ہیں۔
واٹر کارپوریش نے بتایا کہ 46 گھنٹوں میں شہر کو 185 ملین گیلن پانی کی کمی کا سامنا کرنا پڑا ہے، بجلی کا بریک ڈاؤن 26 جون کی رات 10 بجے ہوا تھا۔
