کینیا کے گاؤں موکوکو میں خلا سے ایک نامعلوم چیز آکر گری ہے، تاہم گاؤں والے خوش قسمتی سے جانی نقصان سے محفوظ رہے۔
خلا سے جو چیز گاؤں موکوکو میں گری اس کا وزن تقریباً 500 کلو گرام ہے، اس کا قطر 2.5 میٹر بتایا جارہا ہے، کینین حکام نے بتایا کہ یہ چیز ’ممکنہ طور پر راکٹ کے الگ ہونے کے مرحلے کے دوران یہ چیز زمین پر آکرگری ہے‘۔
حکام نے مزید بتایا کہ آسمان کی وسعتوں سے گرنے والی اس چیز کے ملبے کے ٹکڑوں کا جائزہ لیا جائے گا تاکہ پتا چلایا جاسکے کہ چیز کس ملک سے تعلق رکھتی ہے۔
میجر ایلوئس ویر جو کہ کینیا کی خلائی ایجنسی سے تعلق رکھتے ہیں تو ان کا کہنا ہے کہ یہ ملبہ کس ملک یا ادارے کا ہے اس کی شناخت کی جائے گی،
کینین خلائی ایجنسی کے اہلکار نے کہا کہ جو بھی اس چیز کے گرنے کا ذمہ دار ہوگا بین الاقوامی قانون کے مطابق قانونی طریقہ کار کا استعمال کرتے ہوئے اسکا محاسبہ کیا جائے گا۔
یہ بات قابل ذکر ہے کہ زیادہ تر صورتوں میں یہ ہوتا ہے کہ خلائی ملبہ فضا میں داخل ہوتے وقت جل جاتا ہے یا غیرآباد علاقوں جیسے سمندر میں گرتا ہے۔ تاہم ہمیشہ یہ ممکن نہیں کہ خلا سے گرنے والی چیز غیرآباد علاقے میں گرے۔
ماہرین کا ماننا ہے کہ اس طرح کے واقعات سنگین خطرات کا سبب بن سکتے ہیں، پچھلے سال مئی 2024 میں اسپیس ایکس کے ملبے کا ایک ٹکڑا شمالی کیرولینا میں ایک پہاڑی علاقے کے قریب ہائیکنگ ٹریک پر گرا تھا۔
