کیرلا: بھارت میں سونے کی قیمتوں کے حوالے سے بڑا قدم اٹھایا گیا ہے، ریاست کیرلا کے تمام شہروں میں اب سونا یکساں قیمت پر فروخت ہوگا۔
تفصیلات کے مطابق سونے کی قیمتیں عام طور سے مختلف شہروں میں مختلف ہوتی ہیں، لیکن بھارتی ریاست کیرلا اب ملک کی پہلی ریاست بن گئی ہے جہاں تمام شہروں میں ’یونیفارم گولڈ پرائس‘ نافذ کی گئی ہے۔
یونیفارم گولڈ پرائس کے نفاذ کے بعد اب ریاست کیرلا میں صارف کسی بھی شہر اور کسی بھی دکان میں چلا جائے، سونے کی قیمت یکساں ہوگی۔
میڈیا رپورٹس کے مطابق یونیفارم گولڈ پرائس نافذ ہونے کے بعد ریاست کیرلا میں سونے کی قیمتیں بینک شرح کے مطابق ہی طے ہوں گی، اور یہ اصول صرف 916 کی شفافیت والے 22 قراط سونے پر ہی نافذ ہوگا، یعنی اس سے کم قراط والے سونے کی قیمت اب بھی کیرلا کے الگ الگ شہروں میں الگ الگ ہی ہوگی۔
یہ فیصلہ کیرلا کے اہم جوئیلرز نے گزشتہ ہفتے کیا، واضح رہے کہ سونے کی خرید و فروخت کے معاملے میں کیرلا پورے ملک میں سرفہرست ہے۔
