اسلام آباد : وفاقی حکومت نے امریکی شہری خدیجہ شاہ کو قونصلر رسائی دینے کا فیصلہ کرلیا ، وہ جناح ہاؤس حملہ کیس کی مرکزی ملزم ہے۔
تفصیلات کے مطابق وزارت داخلہ نے امریکی سفارتخانے کی درخواست پر خدیجہ شاہ کو قونصلر رسائی دینے کی منظوری دے دی۔
وزارت داخلہ نے نے محکمہ داخلہ پنجاب کو امریکی قونصلیٹ سے مکمل تعاون کرنے کی ہدایت کردی۔
اس سے قبل ترجمان دفتر خارجہ کا کہنا تھا کہ پاکستان اپنے قوانین اور عالمی ذمہ داریوں پرعمل کرے گا، پاکستان نے آئینی طور پر انسانی حقوق اور بنیادی آزادیوں کی ضمانت دی ہے، قونصلررسائی کی درخواست پر حتمی فیصلہ وزارت داخلہ کرتی ہے
امریکی سفارتخانےکی درخواست وزارت خارجہ کے ذریعےوزارت داخلہ کوموصول ہوئی تھی، جس میں امریکی سفارت خانے نے وزارت داخلہ سے شاہ تک قونصلر رسائی حاصل کرنے کی درخواست کی تھی۔
یاد رہےمحکمہ خارجہ کے نائب ترجمان ویدانت پٹیل نے پریس کانفرنس کرتے ہوئے خدیجہ شاہ تک قونصلر رسائی دینے کا مطالبہ کیا تھا۔
امریکی ترجمان کا کہنا تھا کہ خدیجہ شاہ کی دہری شہریت ہے، اس سلسلے میں پاکستانی حکام سے براہ راست رابطے میں ہیں، کوئی امریکی شہری گرفتار ہوتا ہے تو ان کی ممکنہ مدد کے لیے تیار رہتے ہیں، پاکستانی حکام سے توقع رکھتے ہیں کہ منصفانہ سماعت کی گارنٹی ہوگی۔
واضح رہے پولیس نے سابق وزیر خزانہ سلمان شاہ کی بیٹی اور فیشن ڈیزائنر خدیجہ شاہ کو 9 مئی کو جناح ہاؤس حملہ کیس میں گرفتار کیا تھا۔
خدیجہ شاہ 9 مئی کے واقعات کے بعد اپنی گرفتاری سے بچنے کے لیے کچھ دن روپوش ہوگئیں تھیں ، بعد ازاں، اقبال ٹاؤن لاہور میں ایس ایس پی سی آئی اے پولیس ملک لیاقت کے سامنے گرفتاری پیش کردی تھی۔
