لاہور : تحریک لبیک کےسربراہ علامہ خادم حسین رضوی کی نمازِ جنازہ آج دن گیارہ بجے مینار پاکستان کے میدان میں ادا کی جائے گی۔
تفصیلات کےمطابق تحریک لبیک کےسربراہ علامہ خادم حسین رضوی کی نمازجنازہ آج صبح 11 بجے ادا کی جائےگی ، میت نمازجنازہ کی ادائیگی کیلئے مینارپاکستان روانہ کردی گئی ہے۔
خادم حسین رضوی کی نمازجنازہ مینار پاکستان گراؤنڈ میں ادا کی جائے گی، کارکنوں کی آمد کا سلسلہ جاری ہے اور کارکنوں کی بڑی تعداد ملتان روڈ پر مسجد رحمت العالمین کے باہر موجود ہیں۔
یاد رہے 2 روز قبل تحریک لبیک پاکستان کے سربراہ مولانا خادم حسین رضوی لاہور میں وفات پاگئے تھے ، خادم رضوی چند روز سے بخار میں مبتلا تھے، طبیعت زیادہ خراب ہونےپرمولانا خادم رضوی کو شیخ زید اسپتال پہنچایا گیا، اسپتال انتظامیہ کاکہنا تھا خادم رضوی جب اسپتال پہنچے تو انتقال کرچکے تھے۔
بعدازاں آرمی چیف جنرل قمر جاوید باجوہ، وزیراعظم عمران خان سمیت اہم سیاسی و مذہبی شخصیات نے تحریک لبیک پاکستان کے سربراہ خادم حسین رضوی کے انتقال پر تعزیت کا اظہار کیا۔
خیال رہے خادم حسین رضوی سیاست میں آنے سے قبل لاہور میں محکمہ اوقاف کی مسجد میں خطیب تھے، ممتاز قادری کی سزا پر عملدرآمد کے بعد انہوں نے کھل کر حکومت وقت پر تنقید کی جس کی وجہ سے انہیں محکمہ اوقاف نے ان کو عہدے سے ہٹا دیا تھا۔
