کراچی: چڑیا گھر میں سفید شیر کی ہلاکت پر انکوائری کے دوران ہٹائے گئے افسر خالد ہاشمی کو دوبارہ تعینات کر دیا گیا۔
ایک طرف ایم کیو ایم کے تجویز کردہ افسران کو ایڈمنسٹریٹرز کے عہدے سے ہٹانے کی تیاری کی جا رہی ہے، دوسری طرف سندھ حکومت اپنے پسندیدہ افسران کو عہدے دینے لگی ہے۔
تقرری اور تبادلے پر پابندی کے باوجود معطل افسر خالد ہاشمی کو سینئر ڈائریکٹر زو اینڈ سفاری لگا دیا گیا، خالد ہاشمی کی تعیناتی کا نوٹیفکیشن ایڈیشنل چیف سیکریٹری نے جاری کیا۔
الیکشن کمیشن واضح طور پر ایڈمنسٹریٹر کراچی کو کسی بھی قسم کی ٹرانسفر پوسٹنگ نہ کرنے کی ہدایت کر چکا ہے، تاہم ذرائع کا کہنا ہے کہ خالد ہاشمی کی تعیناتی سے ایڈمنسٹریٹر کراچی بھی لاعلم نکلے ہیں۔
ذرائع کا کہنا ہے کہ خالد ہاشمی کو سابق ایڈمنسٹریٹر مرتضیٰ وہاب نے ڈائریکٹر زو کے عہدے سے ہٹا دیا تھا، چڑیا گھر میں سفید شیر کی ہلاکت پر کارروائی کرتے ہوئے انکوائری شروع کی گئی تھی۔
