کراچی : متحدہ قومی موومنٹ پاکستان کے مرکزی رہنما خالد مقبول صدیقی نے کہا ہے کہ مقبوضہ کشمیر کی آزادی اس خطے کا مقدر بن کررہے گی، جنگ کی سازش کی تو بھارت کو اس کی بھاری قیمت چکانی پڑے گی۔
ان خیالات کا اظہار انہوں نے کراچی میں کشمیری عوام سے اظہار یکجہتی کیلئے نکالی گئی ایم کیو ایم کی مرکزی ریلی سے خطاب کرتے ہوئے کیا۔
تفصیلات کے مطابق ایم کیوایم پاکستان کے زیراہتمام کشمیری عوام سے اظہار یکجہتی کیلئے ریلیاں نکالی گئیں، اس سلسلے میں سوک سینٹر میں مرکزی ریلی کے شرکاء سے خالد مقبول صدیقی، میئر کراچی وسیم اختر اور دیگر نے بھی خطاب کیا۔
اپنے خطاب میں خالد مقبول صدیقی کا کہنا تھا کہ کشمیر کی آزادی اس خطے کا مقدر بن کررہے گی، بھارت نے کشمیرکی حیثیت تبدیل کرکے مذموم مقاصد کو اجاگر کردیا، مقبوضہ کشمیرکی آزادی تک ہم کشمیریوں کے ساتھ کھڑے رہیں گے۔
جنگ کی سازش کی تو بھارت کو بھاری قیمت چکانی پڑے گی، رلی کے شرکاء سے خطاب میں میئر کراچی وسیم اختر کا کہنا تھا کہ بھارت اپنی حرکتوں سے باز نہ آیا تو کراچی کے3 کروڑ لوگ بارڈر کی طرف مارچ کریں گے۔
مزید پڑھیں : کشمیر آور ، پاکستان کے کروڑوں عوام کا کشمیریوں سے فقید المثال اظہار یکجہتی
یاد رہے کہ وزیراعظم عمران خان کے اعلان پر جمعہ کے روز 12 سے ساڑھے بارہ بجے تک مظلوم کشمیری عوام سے اظہار یکجہتی کے لیے پوری قوم نے کشمیر آور منایا، پاکستانی قوم گھروں سے باہر نکل آئی اس موقع پر پاکستان اور کشمیر کے قومی ترانے بجائے گئے۔
