کراچی: ایم کیو ایم کے کنوینر خالد مقبول صدیقی نے کہا ہے کہ وزیراعظم عمران خان سے سندھ کے شہری علاقوں سے زیادتی پر بات ہوئی، سندھ کے شہری علاقوں کے لیے پیکیج پر فیصلہ کیا گیا ہے۔
ان خیالات کا اظہار انہوں نے ایم کیو ایم وفد کی وزیراعظم سے ملاقات کے بعد میڈیا سے گفتگو کرتے ہوئے کیا، وفد میں خالد مقبول، عامر خان، کنور نوید، وسیم اختر، فیصل سبزواری، فروغ نسیم شامل تھے۔
خالد مقبول صدیقی نے کہا کہ عمران خان سے لاپتہ افراد سے متعلق قانون سازی پر بات ہوئی، مارٹن کوارٹرز، ایف سی ایریا کے لوگوں کا مقدمہ پیش کیا جبکہ میئر کراچی کی وزیراعظم سے الگ ملاقات ہوئی۔
ایم کیو ایم کنوینر نے کہا کہ کراچی کو اتنا ہی پیکیج ملنا چاہئے جتنا اس کا حق ہے، کراچی کے لیے 500 ارب ہیں، 500 ارب کی فوری ضرورت ہے، کراچی کو ہر سال 100 ارب کی ضرورت ہے، کراچی نے اپنی ذمہ داری ہمیشہ نبھائی، اب ریاست بھی ذمہ داری نبھائے۔
انہوں نے کہا کہ فاروق ستار کو بات چیت کے لیے بلایا ہے جب آئیں گے تو نظر آجائیں گے، وہ اپنے مستقبل کا خود تعین کریں گے، ہم ان کے منتظر ہوں گے۔
کراچی کا مقدمہ وزیراعظم کے سامنے رکھا، میئر کراچی
میئر کراچی وسیم اختر نے کہا کہ کے فور کے لیے وفاق سے پیسے ملنے چاہئیں، وزیر اعظم سے کہا کہ کراچی میں پانی کا مسئلہ آسکتا ہے، عمران خان کو شارٹ اور لانگ ٹرم تجاویز دے دی ہیں۔
وسیم اختر کے مطابق کراچی کا مقدمہ وزیراعظم کے سامنے رکھا، وزیراعظم نے کہا کراچی کے مسائل پر وزیرخزانہ سے بات کریں کہ کتنا پیسہ دے سکتے ہیں، واٹر کمیشن سے متعلق 9 اسکیموں کا کہا، وزیراعلیٰ نے ایک بھی منظور نہیں کی ہے۔
