کراچی: ایم کیوایم پاکستان کے کنوینر خالد مقبول صدیقی نے کہا ہے صوبائی خود مختاری سے زیادہ پاکستان کی خود مختاری اہم ہے.
ان خیالات کا اظہار انھوں نے خصوصی پریس کانفرنس میں کیا. خالد مقبول صدیقی نے کہا کہ سندھ میں وسائل کی نچلی سطح پر منتقلی نہیں ہوسکی، کرپشن ختم نہیں ہوگی، تو ہمارا نظام کیسے چلے گا.
پورے پاکستان کا امن کراچی کے امن سے وابستہ ہے
خالد مقبول صدیقی نے 27 اپریل کو ایم کیو ایم کے جلسے سے متعلق کہا کہ یہ جلسہ شہری حقوق کے تحفظ کا تعین کرے گا، ایم کیوایم جلسےمیں سندھ بھر سے کارکنان شرکت کریں گے.
انھوں نے کہا کہ ایم کیوایم پاکستان آج بھی شہری علاقوں کی مؤثر آواز ہے، مردم شماری اور حلقہ بندیوں میں دھاندلی کی گئی، سندھ کےشہری علاقوں کے عوام کی تعداد کم ظاہرکی گئی، سندھ میں جعلی مینڈیٹ رکھنے والی حکومت قابض ہے.
وفاقی وزیر خالد مقبول صدیقی کا کہنا تھا کہ کراچی کی آبادی 3 کروڑ سے ہرگز کم نہیں، جعلی مینڈیٹ والی حکومت نے 10 سال کراچی کو لوٹا، کراچی کاسب سےاہم منصوبہ کےفورناکام بنانے کی کوشش کی گئی.
خالد مقبول صدیقی کا کہنا تھا کہ پورے پاکستان کا امن کراچی کے امن سے وابستہ ہے، پاکستان کی خودمختاری کی سب سے زیادہ اہمیت ہے.
