The news is by your side.

Advertisement

خانہ کعبہ اورمسجد نبوی میں تصاویر اورویڈیو بنانے پرپابندی

ریاض : سعودی عرب کی حکومت نے خانہ کعبہ اور مسجد نبوی کے اندر اور باہر کسی بھی قسم کی تصویر یا ویڈیو بنانے پر پابندی عائد کردی ہے، خلاف ورزی پر سخت قانونی کارروائی کا عندیہ دیا گیا ہے۔

تفصیلات کے مطابق سعودی حکومت نے حجاج اور عمرہ زائرین کیلئے ایک حکم جاری کیا ہے جس میں کہا گیا ہے کہ حرمین شریفین کی حدود میں موبائل فون کے ذریعے کسی بھی قسم کی ویڈیو یا تصویر لینا قطعاً منع ہے۔

اس حوالے سے سعودی وزارت خارجہ نے تمام سفارت خانوں کو ہدایت کی ہے کہ وہ اپنے شہریوں کو اس حکم کا سختی سے پابند بنائیں۔

سعودی وزیر خارجہ کے نوٹیفکیشن کے مطابق مملکت میں  آنے والے معتمرین اور عازمین حج کو اس بات سے آگاہ کر دیا جائے کہ وہ حرمین میں اپنے موبائل یا کیمروں سے سیلفیاں اور تصاویر نہ بنائیں۔ خلاف ورزی کرنے والے افراد کے خلاف قانونی کارروائی کی جائے گی۔

سعودی میڈیا کے مطابق مختلف ممالک سے آنے والے معتمرین اور حجاج حرمین شریفین میں اپنا زیادہ وقت تصویر کشی میں ضائع کرتے ہیں جس سے ان کی اور دوسروں کی عبادت میں خلل پڑتا ہے۔

لہٰذا اس ضمن میں متعلقہ اداروں کو ہدایت کی گئی ہے کہ وہ اس حکم پر عمل درآمد کرائیں اور قانون کی خلاف ورزی کرنے والے افراد کے کیمرے اور موبائل فون بحق سرکار ضبط کرلیے جائیں۔

Print Friendly, PDF & Email

Comments

comments

یہ بھی پڑھیں