لاہور: لیگی رہنما خواجہ آصف کو آنکھ میں انفیکشن کے باعث لاہور کے اسپتال منتقل کردیا گیا ہے۔
تفصیلات کے مطابق مسلم لیگ نون کے ایک اور رہنما گرفتاری کے بعد جیل سے اسپتال پہنچ گئے ہیں، خواجہ آصف کو کوٹ لکھپت جیل کے حکام نے آج آنکھوں میں انفیکشن کے باعث میئو اسپتال منتقل کیا۔
اسپتال منتقل کرنے کے بعد لیگی رہنما کو اسپتال کے وی آئی پی روم اےوی ایچ وارڈ میں منتقل کیا گیا،جہاں ان کا کرونا ٹیسٹ بھی کیا گیا۔
اس حوالے سے سی ای او میو اسپتال پروفیسر اسد اسلم کا کہنا تھا کہ خواجہ آصف کی آنکھوں میں سفید موتیا ہے ، خواجہ آصف کے ضروری ٹیسٹ ہو رہے ہیں، وہ صحت مند ہے، رپورٹس کل تک آجائیں گی ،جس کے بعد آپریشن کا فیصلہ کیا جائے گا۔
سابق اسپیکر قومی اسمبلی ایاز صادق کے بیٹے خواجہ آصف کا علاج کرینگے۔
یہ بھی پڑھیں: خواجہ آصف نے جیل میں سہولتیں مانگ لیں
واضح رہے نیب نے لیگی رہنما خواجہ آصف کو آمدن سے زائد اثاثوں کے کیس میں گذشتہ سال انتیس دسمبر گرفتار کیا تھا، ان کی گرفتاری احسن اقبال کے گھر سے عمل میں لائی گئی تھی۔
خواجہ آصف قومی اسمبلی میں مسلم لیگ (ن) کے پارلیمانی لیڈر ہیں اور وہ سابق وزیر خارجہ بھی رہے ہیں، خواجہ آصف قومی اسمبلی کے حلقہ این اے 73 سیالکوٹ 2 سے مسلم لیگ (ن) کے ٹکٹ پر رکن قومی اسمبلی منتخب ہوئے۔
