وزیر دفاع خواجہ آصف نے کہا ہے کہ 9 مئی واقعات پر 25 ملزمان کو شواہد کی بنیاد پر سزا ہوئی، ویڈیو ریلیز ہوئی جس کا مطالبہ بانی پی ٹی آئی کرتے رہے ہیں۔
لندن میں گفتگو کرتے ہوئے خواجہ آصف نے کہا کہ ایسے شخص نے 9 مئی برپا کیا جو خود اسٹیبلشمنٹ کا پراڈکٹ تھا، پی ٹی آئی جب بنی تو اسوقت بھی پہلا جنرل سیکریٹری ریٹائرڈ جرنیل تھا 9 مئی کے معاملات میں فوری فیصلوں کی ضرورت تھی، 9 مئی کرنیوالے تربیت یافتہ افراد تھے۔
خواجہ آصف نے کہا کہ منصوبہ بندی، پلاننگ کے ذریعے حملے کیے گئے سیاسی معاملات کو انتہا تک لیکر جانا قوم کیلئے لمحہ فکریہ ہے، 2018 کے الیکشن میں ان کو اقتدار میں لانے کیلئے آرٹی ایس بٹھایا گیا، نواز شریف کو 2018 الیکشن سے پہلے ہی نااہل قرار دیا گیا اور نوازشریف کو مائنس کرنےکامنصوبہ ماضی کی اسٹیبلشمنٹ کا پرانا منصوبہ تھا۔
ان کا کہنا تھا کہ 4 سال پی ٹی آئی کی حکمرانی میں ہزاروں ارب کے غبن، کرپشن ہوئی، 75 سال پاکستان میں جو کرپشن ہوئی اس سے کوئی انکار نہیں کرسکتا، بانی پی ٹی آئی دور میں جو کرپشن ہوئی وہ حدیں پار کرگئیں، بانی پی ٹی آئی خود ان کےاہلخانہ اور دیگر افراد کرشن میں ملوث رہے، شوکت خانم کے 7ملین ڈالر کےعطیات ملک سے باہر رکھے گئے شوکت خانم سے ہمیں کوئی تکلیف نہیں ہے وہ بہت اچھا اقدام ہے ہمیں تکلیف ہے کہ بانی پی ٹی آئی شوکت خانم کے ڈونر کے پیسے کھاتا ہے، بانی پی ٹی آئی بےایمان اور چور شخص ہے یہ شخص ایک دن امریکا کو گالی دیتاہے دوسرے دن اس کے پیر پکڑ لیتا ہے۔
وزیر دفاع نے اعلان کیا کہ بانی پی ٹی آئی کیخلاف میں وائٹ پیپر بھی لیکر آؤں گا بانی پی ٹی آئی کیخلاف حقائق پر پریس کانفرنس ،اسمبلی میں بھی کروں گا۔
