اسلام آباد : وزیر دفاع خواجہ آصف نے یوم استحصال کشمیر پر بھارت کو دو ٹوک پیغام میں کہا ہے کہ ہندوستان یاد رکھے جموں و کشمیر بین الاقوامی سطح پر تسلیم شدہ تنازع ہے۔
تفصیلات کے مطابق وزیر دفاع خواجہ آصف نے یوم استحصال کشمیر کے موقع پر پیغام میں کہا ہے کہ 5اگست کا بھارتی ایکٹ کسی طور پر قابل قبول نہیں ، کشمیر کی آزادی کےلئے پاکستان فرنٹ لائن پر کھڑا ہے۔
خواجہ آصف نے واضح کیا ہندوستان یاد رکھے جموں و کشمیر بین الاقوامی سطح پر تسلیم شدہ تنازع ہے، تنازع جموں و کشمیر اقوام متحدہ کے ایجنڈے پر برقرار ہے۔
مسئلہ کشمیر کا حل یواین قراردادوں پر عمل درآمد میں مضمر ہے، پاکستان ہمیشہ کشمیریوں کے حق خود ارادیت کی منصفانہ جدوجہدمیں مدد فراہم کرتا رہے گا، دنیابھارت کو کشمیریوں پر مظالم ،آبادیاتی ڈھانچے کو تبدیل کرنے سے روکے۔
پاکستان علاقائی امن و استحکام کا حامی ہے، پاکستان کسی بھی جارحانہ عزائم کوناکام بنانے کی پوری صلاحیت رکھتا ہے۔
ماضی قریب سمیت متعدد مواقع پر اپنے عزم اور صلاحیت کا مظاہرہ کیا ہے ،عالمی برادری بھارت کو مقبوضہ کشمیرمیں انسانی حقوق کی پامالیوں سے روکے اور 5اگست کے غیر قانونی ایکٹ کو ہٹا کر کشمیر کی پرانی حیثیت بحال کی جائے۔
