اسلام آباد : وزیردفاع خواجہ آصف نے کہا ہے کہ کیا عدلیہ کے 18،17 لوگ آسمان سے آئے؟ کیا ان کا احتساب نہیں ہوسکتا ؟
ان خیالات کا اظہار انہوں نے قومی اسمبلی کے اجلاس سے خطاب کرتے ہوئے کیا، انہوں نے کہا کہ جو آزاد ارکان یہاں آئے ہیں، ان کی وابستگی پی ٹی آئی کے ساتھ نہیں، یہ آزاد منتخب ہوئے ہیں۔
ان کا کہنا تھا کہ ووٹ کو عزت جج نہیں بلکہ اراکین پارلیمنٹ دیتے ہیں، ہم منتخب لوگوں کو عزت دے رہے ہیں۔
وزیر دفاع خواجہ آصف نے کہا کہ کیا ایسا ہوسکتا ہے کہ 8 لوگ بیٹھ کر پارلیمان کو یرغمال بنالیں، اداروں کی عزت ان میں بیٹھے شخصیات سے ہوتی ہے، آج عدلیہ کو ڈرائی کلین کیا جارہا ہے تو اس کی بھی وجہ ہے۔
ان کا کہنا تھا کہ قید سیاستدان کاٹیں، شہید سیاستدان ہوں اور احتساب بھی سیاستدان بھگتیں، کیا عدلیہ کے سترہ، اٹھارہ لوگ آسمان سے آئے ہیں؟ کیا ان کا احتساب نہیں ہوسکتا؟
خواجہ آصف نے کہا کہ جسٹس قاضی فائز عیسیٰ واحد جج ہیں جنہوں نے عدلیہ کی عزت بحال کی، جسٹس قاضی فائز عیسیٰ عزت کے ساتھ گھر جارہے ہیں، یہ سب کچھ ایک سال سے اس لئے چل رہا ہے کہ ایک گروپ کی اجارہ داری عدلیہ سے ختم نہ ہو۔
