The news is by your side.

لیگی رہنماؤں کی روش برقرار، اداروں پر الزامات سے باز نہ آئے

لاہور: نون لیگ کی روش برقرار، اداروں پر الزامات لگانے سے باز نہ آئی۔

تفصیلات کے مطابق لاہور میں میڈیا سے گفتگو کے دوران وزیر ریلوے خواجہ سعد رفیق نے ہزرہ سرائی کرتے ہوئے کہا کہ ریاستی اداروں نے عمران خان کو یہ سبق سکھایا ہے کہ جو بے لگام، منھ پھٹ اور بدتمیز ہو، اس سے ڈرو، جو بدتمیزی نہ کرے، اسے رگڑا لگادو۔

وفاقی وزیر نے میڈیا سے گفتگو کے دوران اسی پر بس نہیں کیا، پاکستان کے نظام انصاف پر بھی انگلیاں اٹھائیں اور کہا کہ پاکستان میں انصاف کا نظام یہ ہے کہ کوئی پتلی گلی سے نکل رہا ہے، کوئی کئی کئی سال کی بے گناہ سزا کاٹ رہا ہے۔

پنجاب حکومت کی تبدیلی سے متعلق پوچھے گئے سوال پر لیگی رہنما خواجہ سعد رفیق کا کہنا تھا کہ پنجاب میں حکومت بدل رہی یا نہیں؟جس نےکہا اسے معلوم ہوگا۔

وفاقی وزیر ریلوے نے عمران خان کا نام لئے بغیر تنقید کے نشتر چلاتے ہوئے کہا کہ سیلاب کے باعث ایک تہائی پاکستان ڈوبا ہوا ہے جبکہ ایک شخص 10، دس کروڑ کے جلسے کررہا ہے، میرا سوال یہ ہے کہ جلسے کے پیسے کہاں سے آتے ہیں؟ تو اس کا جواب یہ ہے کہ وہ لاڈلہ ہے اس لئے اس سے کچھ پوچھا نہیں جاسکتا۔

Comments

یہ بھی پڑھیں