کراچی : سعودی عرب سے پاکستان آنے والا کورونا زدہ مسافر کراچی پہنچنے پر قرنطینہ سے فرار ہوگیا، خبر ملتے ہی انتظامیہ کی دوڑیں لگ گئیں۔
تفصیلات کے مطابق سعودی عرب سے کراچی پہنچنے والا کورونا متاثرہ مسافر ائیرپورٹ پر قرنطینہ مرکز سے فرار ہوگیا۔
اس حوالے سے ذرائع کا کہنا ہے کہ سوات کا رہائشی متاثرہ شخص نیاز علی سعودی ائیرلائن کی پرواز ایس وی 708کے ذریعے ریاض سے کراچی پہنچا تھا۔
ذرائع کے مطابق سعودی عرب سے کراچی کے جناح انٹرنیشنل ایئرپورٹ پر آنے والی ایک پرواز کے مسافر میں کورونا وائرس کی تصدیق ہوئی، کورونا مثبت آنے والے مسافر کو ایئرپورٹ کے قریب ایک ہوٹل میں بنائے گئے قرنطینہ میں منتقل کیا گیا تھا۔
ذرائع کے مطابق مسافر نیاز علی کا ائیرپورٹ پر ہی ریپڈ ٹیسٹ کیا گیا تو کورونا مثبت آیا، ایف آئی اے کی مبینہ غفلت کے سبب مسافر ائیرپورٹ کے قرنطینہ ایریا سے فرار ہوا۔ سی سی ٹی وی کیمروں کی بھی مدد لی گئی لیکن مسافر کو ڈھونڈا نہ جاسکا۔
