کراچی : کسٹمز اہلکاروں نے کراچی ایئرپورٹ جناح ٹرمینل پر کارروائی کرتے ہوئے لاکھوں مالیت کے قیمتی آئی فونز، ٹیبلٹس اور لیپ ٹاپس اسمگل کرنے کی کوشش ناکام بنادی۔،
اے آر وائی نیوز کی رپورٹ کے مطابق کراچی ایئرپورٹ پر پاکستان کسٹمز نے کارروائی کرتے ہوئے جرمن شہری سے قیمتی موبائل فونز اور لیپ ٹاپ برآمد کرلیا۔
کسٹمز حکام کے مطابق مسافر محمد یوسف خان جرمنی سے دبئی کے راستے کراچی پہنچا تھا۔ ابتدائی اسکیننگ کے دوران سامان میں مشکوک اشیا کی نشاندہی ہوئی۔
شک کی بنیاد پرمسافر کے سامان کو ریڈ چینل پر منتقل کرکے جانچ پڑتال کی گئی تو تلاشی کے دوران غیر قانونی 62موبائل فون، لیپ ٹاپ اور ٹیبلٹس برآمد ہوئے، جنہیں مبینہ طور پر اسمگل کرنے کی کوشش کی جارہی تھی۔
برآمد کیے جانے والے سامان کی مالیت 20لاکھ روپے سے زائد بتائی جارہی ہے، کسٹمز حکام نے اسمگلنگ کے زمرے میں آنے والی اشیا کو ضبط کرلیا۔
مزید پڑھیں : کراچی ایئرپورٹ پر موبائل فونز اسمگلنگ کی کوشش ناکام
یاد رہے کہ اس سے قبل رواں سال فروری میں جناح انٹرنیشنل ایئرپورٹ پرموبائل فونز اسمگلنگ کی کوشش ناکام بنادی گئی تھی، اور دو ملزمان کو رنگے ہاتھوں گرفتار کیا گیاتھا۔
کسٹمز حکام نے کارروائی کرکے تھائی لینڈ سے کراچی آنے والے 2 مسافروں سے 23موبائل فون برآمد کیے تھے۔ ڈپٹی کلکٹر کسٹم کراچی ایئرپورٹ کشمالہ تحسین نے بتایا کہ ملزمان کے قبضے سے برآمد کیے گئے موبائل فونز کی مجموعی مالیت 35 لاکھ روپے تک ہے۔
