اسلام آباد: قائد حزب اختلاف خورشید شاہ نے حکومت کی خاموشی کو مجرمانہ عمل قرار دے دیا اور کہا ہے کہ بھارت نے ہمارے 40 جوانوں کو شہید کیا ہے،حکومت کی خاموشی سمجھ سے بالاتر ہے۔
قومی اسمبلی میں اظہار خیال کرتے ہوئے خورشید شاہ نے کہا کہ بھارت نت نئے انداز سے پاکستان پر حملے کررہا ہے پاکستانی جوانوں اور نہتے عوام کو نشانہ بنایا جا رہا ہے اس پر حکومت کی خاموشی مجرمانہ غفلت ہے۔
ان کا کہنا تھا کہ پاکستان جنگ نہیں چاہتا لیکن ہم کب تک لاشیں اٹھاتے رہیں گے، حکومت کو بھارتی جنگی جنون کا جواب دینا چاہیے کیونکہ بھارتی حکمران جنگ چاہتے ہیں۔
بھارتی جارحیت جاری رہی توخاموش نہیں رہیں گے،عبدالقادر بلوچ
وفاقی وزیر سیفران عبدالقادر بلوچ نے کہا کہ ہم امن چاہتے ہیں اسے کمزوری نہ سمجھا جائے، اگربھارتی جارحیت جاری رہی تو خاموش نہیں رہیں گے۔
خورشید شاہ کے خطاب کے بعد قومی اسمبلی میں سوالات کا جواب دیتے ہوئے وفاقی وزیر عبدالقادر بلوچ نے کہا کہ پاکستان بھارتی کارروائی کا موثر جواب دے رہا ہے، اب خاموش نہیں بیٹھیں گے بہت صبر کیا اب ادلے کا بدلہ ہو گا۔
انہوں نے مزید کہا کہ خورشید شاہ سے ایسی باتوں کی توقع نہیں تھی،تاثر دیا گیا کہ ہماری دوستی ہندوستان سے ہے۔
