سکھر: نیب نے پاکستان پیپلز پارٹی کے سینئر رہنما خورشید شاہ سے اثاثوں کی تفصیلات طلب کر لیں.
تفصیلات کے مطابق آمدن سے زائد اثاثہ جات اور منی لانڈرنگ کی تحقیقات کے سلسلے میں خورشید شاہ کو سوال نامہ ارسال کیا گیا ہے.
موصولہ اطلاعات کے مطابق 50 سے زائد محکموں سے خورشید شاہ کے اثاثوں کی تفصیلات مانگی گئی ہیں.
ڈی سیز کو سابق اپوزیشن لیڈر خورشید شاہ کی تمام جائیدادوں سے متعلق مکمل آگاہی دینے کی ہدایت کی ہے، ایف بی آر، محکمہ ایکسائز، اسٹیٹ بینک سے بھی تفصیلات طلب کی گئی ہیں.
ڈی جی نیب سکھر کے مطابق خورشید شاہ کو اہل خانہ سمیت اگلے ہفتے نیب آفس طلب کیا جائے گا، جہاں ان سے سوالات ہوں گے.
خیال رہے کہ 29 اگست 2019 کو چیئرمین نیب جسٹس (ر) جاوید اقبال نے کہا تھا کہ ہم نے 20 ماہ میں 71 ارب روپے قومی خزانے میں جمع کرائے.
ان خیالات کا اظہار انھوں نے نیب لاہور کے دورہ کے موقع پر کیا. ڈی جی نیب سلیم شہزاد نے اس موقع پر میگا کرپشن کیسزپر چیئرمین کو بریفنگ دی.
چیئرمین نیب نے لاہور بیورو کی کارکردگی کو سراہا. جسٹس (ر) جاوید اقبال نے کہا کہ میگا کرپشن کیسز کے مقدمات کو انجام تک پہنچانا ترجیح ہے.
