کراچی : سندھ اسمبلی میں قائد حزب اختلاف خواجہ اظہار الحسن نے کہا ہے کہ سندھ حکومت میں جانے کے لیے بھی تیار ہیں لیکن اس کے لیے شرط ہے کہ وزیر اعلٰی کا عہدہ ایم کیو ایم پاکستان کو دیا جائے۔
اپوزیشن لیڈر خواجہ اظہار الحسن میڈیا سے بات کر رہے تھے انہوں نے دعویٰ کیا کہ بہت جلد کراچی کی قدآور شخصیات ایم کیوایم پاکستان میں شامل ہوں گی۔
ایک سوال کے جواب میں خواجہ اظہار کا کہنا تھا کہ ایم کیو ایم پاکستان سندھ کابینہ کا حصہ بن سکتی ہے لیکن اس کے لیے شرط یہ ہے کہ وزیر اعلیٰ کا عہدہ ایم کیو ایم پاکستان کو دیا جائے۔
اس موقع پر خواجہ اظہار نے وزیراعلیٰ سندھ مراد علی شاہ سے بلدیاتی نمائندوں کو اختیارات دینے کا بھی مطالبہ کیا ،ان کا کہنا ہے مرادعلی شاہ ضد چھوڑدیں اپنے فیصلوں پر نظر ثانی کریں۔
انہوں نے حکومت سندھ کو متنبہ کیا کہ اگر بلدیاتی نمائندوں کو اخیتارات نہ دیئے گئے تو مجبوراًمحبت میں دھرنے دیں گے ہم سندھ میٰں قائم باہمی ورکنگ ریلیشن شپ کو تباہ اور دیہی و شہری سندھ میں تناؤ نہیں چاہتے۔
نو منتخب اسیر میئر کراچی وسیم اختر کی رہائی کی خبر پر تبصرہ کرتے ہوئے انہوں نے کہا اب ٹیم کا کپتان وسیم اختر میدان میں آگیا ہے ترقی کے سفر کو اب کوئی روک نہیں سکتا۔
