کوئٹہ: خضدار میں اسکول بس پر بھارتی اسپانسرڈ دہشت گردوں کے بزدلانہ حملے کا مقدمہ سی ٹی ڈی تھانے میں درج کرلیا گیا ہے۔
تفصیلات کے مطابق خضدار اسکول بس پر بم حملے کا مقدمہ سی ٹی ڈی تھانے میں درج کرلیا گیا ہے، سی ٹی ڈی حکام کے مطابق مقدمہ پولیس کی مدعیت میں درج کیا گیا ہے جس میں قتل، اقدام قتل اور انسداد دہشتگردی کی دفعات شامل کی گئی ہیں
دوسری جانب اسکول بس پر دہشت گردوں کے بزدلانہ حملے میں شدید زخمی ہونے والی آٹھویں جماعت کی طالبہ سحر سلیم زخموں کی تاب نہ لاکر شہید ہوگئی، واقعے میں شہید طالبات کی تعداد 4 ہوگئی ہے۔
سیکیورٹی ذرائع کے مطابق میدان جنگ میں ذلت آمیز شکست کے بعد بھارت بزدلانہ کارروائیوں پر اتر آیا ہے، خضدار حملے کی منصوبہ بندی بھارت میں کی گئی۔
سیکیورٹی ذرائع نے کہا کہ بلوچستان میں پراکسیوں نے حملے کو منطقی انجام تک پہنچایا، بھارت بلوچستان اور کےپی میں دہشت گردی کیلئے بھارتی پراکسیوں کا استعمال کررہا ہے۔
خضدار: بھارتی اسپانسرڈ دہشت گردوں کا اسکول بس پر حملہ، 3 بچوں سمیت 5 افراد شہید
واضح رہے کہ گزشتہ روز خضدار میں اسکول بس پر دہشت گردوں کے حملے میں 3 طالبات سمیت 5 افراد شہید اور 38 زخمی ہوگئے تھے۔
