خضدار : مقامی قبائلی رہنما میر مہر اللہ محمد حسنی 4 ساتھیوں سمیت قاتلانہ حملے میں جاں بحق ہوگئے، میر مہر اللہ محمد حسنی کا قافلہ کراچی جارہا تھا۔
تفصیلات کے مطابق خضدار میں قبائلی رہنما میر مہر اللہ محمد حسنی کے قافلے پر مسلح افراد نے فائرنگ کردی ، پولیس نے بتایا کہ فائرنگ کا تبادلہ دو گھنٹے تک جاری رہا، جس میں میر مہر اللہ محمد حسنی سمیت چار افراد جاں بحق ہوگئے۔
پولیس کا کہنا تھا کہ میر مہر اللہ محمد حسنی کا قافلہ کراچی جارہا تھا، جس پر کرڑو کے مقام پر حملہ ہوا.
پولیس نے کہا کہ واقعے کی تحقیقات کی جارہی ہیں اور ملزمان کی تلاش کیلئے چھاپے مارے جارہے ہیں۔
یاد رہے اگست میں بلوچستان کے علاقوں موسیٰ خٰیل ،قلات اور بالاناڑی میں دہشت گردی کے واقعات میں قبائلی رہنما، پولیس اور لیویز اہلکاروں سمیت 31 افراد جاں بحق ہوگئے تھے۔
کوئٹہ کراچی قومی شاہراہ پر قلات کے علاقے مہلبی مسلح افراد نے ایک ہوٹل پر فائرنگ کردی، جس سے قبائلی رہنما ملک زبر خان محمد حسنی سمیت تین افراد جاں بحق ہوئے تھے۔
