The news is by your side.

Advertisement

خیبر پختونخوا کابینہ میں توسیع، عاطف خان کی واپسی

پشاور: خیبر پختونخوا کابینہ میں توسیع کردی گئی ہے، تحریک انصاف کے اہم رہنما عاطف خان کی طویل عرصے بعد کابینہ میں واپسی ہوئی ہے۔

تفصیلات کے مطابق گورنر ہاؤس خیبرپختونخوا میں حلف برداری کی تقریب ہوئی، تقریب حلف برداری میں وزیر اعلیٰ خیبر پختونخوا محمود خان بھی موجود تھے، اس کے علاوہ صوبائی وزراء،اراکین صوبائی اسمبلی، چیف سیکرٹری سمیت مختلف محکموں کے انتظامی سربراہان شریک ہوئے۔

سادہ اور پروقار تقریب میں گورنر خیبر پختونخوا شاہ فرمان نے اراکین صوبائی اسمبلی عاطف خان، شکیل خان، فضل شکور اور فیصل امین گنڈا پور سےحلف لیا، چاروں ارکان کو وزیراعظم عمران خان کی منظوری کے بعد کابینہ میں شامل کیا گیا ہے۔

چار نئے وزرا کی شمولیت سے خیبرپختونخوا میں وزرا کی تعداد سولہ ہوگئی ہے، نئے وزرا کے محکموں کا فیصلہ وزیراعلی محمود خان کریں گے۔

یاد رہے کہ وزیر اعلیٰ خیبر پختونخوا محمود خان کے خلاف بغاوت کرنے پر گزشتہ برس جنوری میں عاطف خان کو کابینہ سے فارغ کیا گیا تھا۔

دو ماہ قبل دورہ پشاور کے موقع پر وزیر اعظم نے وزیراعلیٰ کے پی محمود خان اور گورنر شاہ سلمان اور عاطف خان میں صلح کرائی تھی ، جس کے بعد وزیراعظم نے عاطف خان کو کابینہ میں واپسی کا عندیہ بھی دیا تھا۔

Comments

یہ بھی پڑھیں