کراچی : پولیس نے نارتھ ناظم آباد کے علاقے سے اغوا کار خاتون کو گرفتار کرکے اس کے قبضے سے ایک ماہ کا بچہ بازیاب کرالیا، لانڈھی سے موٹرسائیکل چوروں کا چار رکنی گروہ پکڑا گیا۔
تفصیلات کے مطابق پولیس نے اغوا ہونے والے ننھے بچے و بازیاب کرکے ملزمہ کو گرفتار کرلیا، اس حوالے سے پولیس حکام کا کہنا ہے کہ دوپہرکو بچے کو فروخت کرنے والے گروہ کی ایک کارندہ خاتون گرفتار ہوئی۔
دوران تفتیش اقصیٰ نامی اغوا کار خاتون سے ایک ماہ کا بچہ محمد مجاہد ولد کلیم بازیاب کیا گیا، کارروائی نارتھ ناظم آباد بلاک ایچ میں کوثرنیازی کالونی میں کی گئی۔
پولیس حکام کے مطابق اغوا کار ملزمہ اقصیٰ نے17ستمبر کو اپنی ایک رشتہ دار خاتون کا بچہ اغوا کیا تھا، اقصیٰ نے بچے کی والدہ صائمہ کو دعوت پرگھر بلایا اور نشہ آور چیز دی۔
پولیس حکام نے میڈی اکو بتایا کہ نشہ آور چیز کھا کر بچے کی ماں بےہوش ہوگئی تو ملزمہ اس کا ایک ماہ کا بچہ لے کرغائب ہوگئی۔ بچے کو 5لاکھ روپے میں فروخت کیا جانا تھا۔
علاوہ ازیں ڈیفنس پولیس نے کامیاب کارروائی کرتے ہوئے مسروقہ موٹر سائیکلوں کے پرزہ جات فروخت کرنے والے چار ملزمان کو رنگے ہاتھوں پکڑ لیا۔
پولیس کے مطابق مذکورہ ملزمان قیوم آباد سے مسروقہ موٹرسائیکلوں کے پرزہ جات فروخت کیلئے دوسرے علاقے میں لے کر جارہے تھے۔ اطلاع ملنے پر علاقہ میں گشت پر مامور ڈیفنس پولیس کے اہلکاروں نے ملزمان کو رنگے ہاتھوں سامان سمیت گرفتار کرلیا۔
