اسلام آباد: وزیر اعظم عمران خان نے ایم کیو ایم کارکن کی لاش ملنے کے معاملے کا نوٹس لیتے ہوئے وفاقی وزیر داخلہ اعجاز شاہ کو معاملہ دیکھنے کی ہدایت کر دی۔
تفصیلات کے مطابق آج وزیر اعظم عمران خان کی زیر صدارت وفاقی کابینہ کا اجلاس منعقد ہوا جس میں لاپتا افراد کا معاملہ ایک بار پھر زیر بحث آیا۔
کابینہ اجلاس میں وزیر اعظم کے سامنے لاپتا افراد کا معاملہ متحدہ قومی موومنٹ پاکستان کے وفاقی وزیر امین الحق نے اٹھایا، امین الحق نے کہا 2016 میں اغوا ہونے والے کارکن شاہد کلیم کی پراسرار موت ایک سنجیدہ معاملہ ہے۔
وزیر اعظم عمران خان نے ایم کیو ایم کارکن کی لاش ملنے کے معاملے کا نوٹس لیتے ہوئے وفاقی وزیر داخلہ اعجاز شاہ کو معاملہ دیکھنے کی ہدایت کی۔
اپوزیشن جلسوں کے ذریعے کرونا پھیلا رہی ہے: وزیر اعظم
اجلاس میں ایم کیو ایم نے کراچی ٹرانسفارمیشن اجلاس میں نہ بلائے جانے پر بھی اعتراض کیا، امین الحق کا کہنا تھا اتحادی جماعت کو کراچی ٹرانسفارمیشن اجلاس میں بلایا جانا چاہیے تھا۔
وزیر اعظم عمران خان نے کہا کہ آپ ٹھیک کہہ رہے ہیں، آپ کی شرکت ہونی چاہیے تھی، وزیر اعظم نے آئندہ اجلاس میں ایم کیو ایم کو دعوت دینے کی یقین دہانی کرائی۔
