نئی دہلی : اپنے اغوا کا ڈرامہ رچا کر والد سے لاکھوں روپے تاوان کا مطالبہ کرنے والی لڑکی کو پولیس نے 3 ساتھیوں سمیت گرفتار کرلیا۔
بھارت میں ضلع جھانسی کی پولیس نے ایک نوجوان لڑکی کے والد کی مدعیت میں بیٹی کے اغوا کا مقدمہ درج کیا تھا، تفتیش پر یہ انکشاف ہوا کہ مغویہ نے خود ہی اپنے دوستوں سے مل کر اغوا کا ڈرامہ رچایا۔
میڈیا رپورٹ کے مطابق بھارت کے علاقے جھانسی میں آن لائن گیمز کھیلنے کی شوقین نرسنگ کی طالبہ نے خود کو مغویہ ظاہر کرکے اپنے والد سے رقم ہتھیانے کیلئے یہ طریقہ اختیار کیا۔
پولیس کا کہنا ہے کہ ملزمہ آن لائن گیمز میں مقروض ہوگئی تھی، جس کیلئے اس نے اپنے والد سے چھ لاکھ روپے تاوان کا مطالبہ کیا۔
مقدمے کے اندراج کے بعد پولیس نے فوری کارروائی کرتے ہوئے ایک ٹیم تشکیل دی۔ کارروائی کے دوران تین افراد کو حراست میں لیا گیا۔ پوچھ گچھ کے بعد سب سے پہلے جو چیز سامنے آئی وہ موبائل تھا جس سے تاوان کی رقم مانگی گئی تھی۔
بعد ازاں بعد لڑکی اور لڑکے کو نوئیڈا سے برآمد کیا گیا، پوچھ گچھ کے دوران لڑکی نے اپنے جرم کا اعتراف کرتے ہوئے بتایا کہ اس نے اپنے 3 دوستوں کے ساتھ مل کر یہ ڈرامہ کیا تھا۔
تفتیشی افسر نے میڈیا کو بتایا کہ لڑکی آن لائن گیمز کھیلتی تھی اور اس میں اس کا کافی پیسہ ضائع ہوا تھا۔ اس پر دوستوں سے ادھار کی رقم واپس کرنے کا دباؤ تھا، اس دباؤ سے بچنے کے لیے اس نے دوستوں کے ساتھ مل کے خود کو اغوا کرنے کی سازش تیار کی۔
پولیس نے لڑکی اور اس کے تین دوستوں کو گرفتار کرکے لڑکی کا موبائل فون اور دیگر شواہد بھی برآمد کر لیے ہیں۔ پولیس نے بتایا کہ ملزمان کے خلاف دھوکہ دہی و دیگر دفعات کے تحت مقدمہ درج کر لیا گیا ہے۔
