کوئٹہ : سابق چیف جسٹس محمدنورمسکانزئی کے قاتل کو گرفتار کرلیا گیا، دہشت گرد نے سابق چیف جسٹس کے قتل کا اعتراف کرلیا۔
تفصیلات کے مطابق ڈی آئی جی سی ٹی ڈی اعتزازگورایہ نے پریس کانفرنس کرتے ہوئے کہا کہ سابق چیف جسٹس کو شہید کرنے والے دہشت گرد کو گرفتارکرلیا ہے۔
اعتزازگورایہ کا کہنا تھا کہ خاران میں سابق چیف جسٹس نور محمد مسکانزئی کو شہید کیا گیا تھا، جس کے بعد سابق چیف جسٹس کے قتل پراعلیٰ سطحی جوڈیشل کمیشن بنایا گیا تھا۔
ڈی آئی جی سی ٹی ڈی نے بتایا کہ سابق چیف جسٹس قتل کیس میں بہت کام کیا گیا ہے، دہشت گرد شفقت اللہ سے ہینڈ گرنیڈ و اسلحہ برآمد کیا گیا ہے۔
انھوں نے کہا کہ دہشت گرد نے سابق چیف جسٹس کے قتل کا اعتراف کیا ہے، دہشت گرد نےاعتراف کیا کہ ہمسایہ ملک سے احکامات ملے تھے۔
اعتزازگورایہ کا کہنا تھا کہ دوران تفتیش ملزم نے مزید دہشت گرد کارروائیوں کا اعتراف کیا ہے۔
اس سے قبل ذرائع نے بتایا تھا کہ مبینہ قاتل کاتعلق کالعدم تنظیم سے بتایاجاتا ہے جبکہ دوران تفشی مبینہ قاتل نے متعدد دیگر تخریبی وارداتوں میں ملوث رہنے کا اعتراف کیا ہے۔
ذرائع کا کہنا تھا کہ گرفتارمبینہ قاتل کی نشاندہی پر تفتیش کا دائرہ کار بڑھایا جا رہا ہے، کیس میں سہولت کاروں سمیت دیگرکئی مبینہ ملزمان بھی گرفتار ہوں گے۔
