اسلام آباد: پاکستانی دفتر خارجہ نے اپنے تازہ ترین بیان میں کہا ہے کہ ایران میں پاکستانی شہریوں کا قتل ہولناک اور قابل نفرت واقعہ ہے۔
تفصیلات کے مطابق ترجمان دفترخارجہ ممتاز زہرا بلوچ کا کہنا تھا کہ پاکستان واقعے کی مذمت کرتا ہے۔ ہم ایرانی حکام کے ساتھ رابطے میں ہیں۔ پاکستانی شہریوں کا ایران میں قتل ہولناک اور قابل نفرت واقعہ ہے۔
ممتاز زہرا بلوچ نے کہا کہ پاکستان نے واقعے کی تحقیقات اور گھناؤنے جرم میں ملوث افراد کا محاسبہ کرنے پر زور دیا ہے۔
انھوں نے کہا کہ زاہدان میں قونصلر اسپتال جارہے ہیں، جہاں زخمیوں کا علاج کیا جارہا ہے۔ طویل مسافت اور حفاظتی امور کی وجہ سے چند گھنٹے میں پہنچ جائیں گے۔
ترجمان دفترخارجہ نے کہا کہ پاکستانی قونصلر مقامی حکام سے بھی ملاقات کریں گے۔ جرم کے مرتکب افراد کیخلاف کارروائی پر زور دیں گے۔ سنگین معاملے سے پوری طرح آگاہ ہیں اور اقدامات کررہے ہیں۔
ممتاززہرابلوچ نے کہا کہ سفارتخانہ لاشوں کو جلد وطن لانے کی پوری کوشش کرےگا۔ بزدلانہ حملے پاکستان کو دہشت گردی سے لڑنے کے عزم سے نہیں روک سکتے۔
