ترک بحریہ کا جنگی بحری جہاز کنالیاڈا (TCG KINALIADA) کراچی پہنچ گیا، پاک بحریہ کی جانب سے روایتی انداز میں استقبال کیا گیا۔
پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق ترک بحریہ کے جنگی بحری جہاز کنالیاڈا کی پاکستانی حدود میں داخلے پر پاک بحریہ کے جہاز نے ترکیہ کے جہاز کو خوش آمدید کہا۔
آئی ایس پی آر کے مطابق کراچی بندرگاہ پہنچنے پر پاک بحریہ اور ترک سفارت خانے کےافسران نے جہاز کے عملے کا پرتپاک انداز میں استقبال کیا۔
جہازکے کمانڈنگ افسر، پاک بحریہ کے فیلڈ کمانڈرز اور دیگر اعلیٰ حکام سے ملاقاتیں کریں گے، ملاقاتوں میں دونوں ملکوں کی بحریہ میں باہمی دلچسپی کے پیشہ ورانہ امور پر تبادلہ خیال کیا جائے گا۔
آئی ایس پی آر کے مطابق ترک بحریہ کا وفد مزار قائد پر حاضری بھی دے گا، ترک بحریہ کے جہاز کا یہ دورہ برادر ملکوں کی بحریہ میں مضبوط اور دیرینہ تعلقات کا عکاس ہے۔
