لندن: برطانیہ میں بادشاہ چارلس کی تصویر والے نئے بینک نوٹ گردش کرنے لگے ہیں۔
روئٹرز کے مطابق ملکہ الزبتھ کی جگہ بادشاہ بننے کے تقریباً 2 سال بعد کنگ چارلس کی تصویر والے نئے کرنسی نوٹ جاری کر دیے گئے، یہ نوٹ برطانیہ میں گردش کرنے لگے ہیں۔
بینک آف انگلینڈ کے جاری کردہ 5، 10، 20 اور 50 پاؤنڈ والے نئے نوٹوں پر کنگ چارلس کی تصویر نظر آئے گی، جب کہ الزبتھ کی تصویر والے موجودہ نوٹ بھی گردش کرتے رہیں گے۔
الزبتھ پہلی ملکہ تھیں جن کی تصویر برطانوی بینک نوٹوں پر چھاپی گئی تھی، اس کے برعکس انگلینڈ میں سکوں پر بادشاہوں اور رانیوں کی تصاویر 1,000 سال سے زیادہ عرصے سے منقش ہیں۔
بل گیٹس کا اہم اعلان
برطانوی قومی نشریاتی ادارے کے مطابق نئے نوٹوں کا اجرا خراب شدہ نوٹوں کی جگہ کیا جا رہا ہے، جب مانگ پیدا ہوگی تو آہستہ آہستہ بڑی تعداد میں یہ نوٹ جاری کیے جائیں گے۔
نئے بینک نوٹوں کا ڈیزائن پہلی بار دسمبر 2022 میں سامنے لایا گیا تھا، جس کے فوراً بعد چارلس کی تصویر والے سکے جاری کیے گئے، نئے بادشاہ کی تصویر کے علاوہ ان بینک نوٹوں کے ڈیزائن میں کوئی تبدیلی نہیں کی گئی ہے، اور ان نوٹوں کے لیے شاہ چارلس کی تصویر 2013 میں لی گئی تھی۔
