لندن: برطانیہ کے شاہ چارلس سوم کی سالگرہ پر لندن میں ’ٹروپنگ دی کلر‘ کی رنگا رنگ تقریب منعقد ہوئی، بارش کے باوجود ہزاروں افراد بادشاہ کی ایک جھلک دیکھنےکے لیے شاہراہ پر جمع ہو گئے تھے، عوام نے بادشاہ کو سالگرہ کی مبارک باد دی۔
میڈیا رپورٹس کے مطابق بادشاہ چارلس کی اصل تاریخ پیدائش 14 نومبر ہے، تاہم برطانوی بادشاہوں کی عام طور پر گرمیوں کے مہینوں میں دوسری ’سالگرہ‘ بھی ہوتی ہے، موسم کو مدنظر رکھتے ہوئے بادشاہ کی برتھ ڈے کی تقریبات جون میں رکھی جاتی ہیں۔
جون میں بادشاہ کی سالگرہ منانے کی ابتدا 1748 میں کی گئی، جون کے دوسرے ہفتے کے روز برطانوی فوج شاہی خاندان کو خراج تحسین پیش کرنے کے لیے پریڈ کرتی ہے، سالگرہ کے موقع پر شاہی فضائیہ کے طیاروں نے کنگ چارلس کو سلامی دی۔
کینسر کی تشخیص کے بعد شہزادی کیٹ میڈلٹن بھی 5 ماہ بعد منظر عام پر آئیں، وہ پرنس ولیم کے ہمراہ سالگرہ کی تقریب میں شریک ہوئیں، شہزادی کیٹ جنوری میں سرجری، کینسر کی تشخیص کے بعد پہلی بار کسی تقریب میں شریک ہوئی ہیں۔
سالگرہ کے موقع پر 11 بجے بادشاہ چارلس کا شاہی جلوس بکنگھم پیلس سے برآمد ہوا، کنگ چارلس نے برطانوی شاہی افواج کا معائنہ کیا، انھیں سلیوٹ پیش کیا، کنگ چارلس کی سالگرہ کی تقریب کو ’’ٹروپنگ دی کلر پریڈ‘‘ کے نام سے پکارا گیا۔ اس موقع پر 1400 فوجی، 200 گھوڑے اور 400 سازندوں نے پریڈ میں حصہ لیا۔
واضح رہے کہ برطانوی بادشاہ کی باضابطہ سالگرہ منانے کا سلسلہ 260 سال سے بھی زائد عرصے سے جاری ہے، بادشاہ خاندان کے دیگر افراد کے ہمراہ بکنگھم پیلس کی بالکونی پر آ کر باہر افراد کو دیکھ کر ہاتھ ہلاتے ہیں۔
دوسری طرف بادشاہ چارلس کی سالگرہ کے موقع پر بادشاہت کے خلاف شہریوں نے مظاہرہ بھی کیا، بادشاہت کے خلاف مظاہرہ کرنے والوں نے ’’ناٹ مائی کنگ‘‘ کے نعرے لگائے۔
