لندن: کینسر کی تشخیص ہونے کے بعد برطانیہ کے بادشاہ چارلس کا پیغام سامنے آ گیا، جس میں انھوں نے اپنے لیے نیک خواہشات کا اظہار کرنے والوں سے اظہار تشکر کیا ہے۔
برطانوی میڈیا کے مطابق کینسر کی تشخیص ہونے کے بعد پہلی بار کنگ چارلس نے پیغام جاری کرتے ہوئے نیک خواہشات کا اظہار کرنے والوں کا شکریہ ادا کیا، اور کہا کہ ان کے دل کو یہ جان کر تقویت ملی ہے کہ ان کے تجربے کی وجہ سے لوگ چیک اپ کروا رہے ہیں۔
بادشاہ نے اپنا تحریری پیغام نارفولک میں سینڈرنگھم سے جاری کیا ہے، رپورٹس کے مطابق کنگ چارلس کا علاج جاری ہے، شاہی محل کے مطابق بادشاہ کے علاج کے دوران ملکہ کمیلا، ولئ عہد شہزادہ ولیم ان کی جگہ ذمہ داریاں ادا کر رہے ہیں۔
ڈونلڈ ٹرمپ گن کنٹرول کی مخالفت میں کھل کر سامنے آ گئے
75 برس کے بادشاہ چارلس کو لاحق کینسر کی نوعیت تاحال واضح نہیں ہو سکی ہے، پیر کے روز بکنگھم پیلس نے اعلان کیا تھا کہ بادشاہ کو اُس وقت کینسر کی ایک قسم کی تشخیص ہوئی جب ان کے بڑھے ہوئے پروسٹیٹ کا معائنہ کیا جا رہا تھا۔
