ریاض: خادم الحرمین الشریفین شاہ سلمان بن عبدالعزیز اور سعودی ولی عہد شہزادہ محمد بن سلمان نے مقتول صحافی جمال خاشقجی کے قتل پر گہرے دکھ اور افسوس کا اظہار کرتے ہوئے جمال خاشقجی کے اہل خانہ سے تعزیت کی ہے۔
عرب میڈیا کے مطابق شاہ سلمان بن عبدالعزیز نے جمال خاشقجی کے صاحبزادے صلاح خاشقجی سے ٹیلیفون پر ان کے والد کے استنبول میں سعودی قونصل خانے میں قتل پر تعزیت کی اور لواحقین کے ساتھ ہمدردی کا اظہار کیا۔
اس موقع پر صلاح خاشقجی نے شاہ سلمان کی جانب سے تعزیت پر ان کا خصوصی شکریہ ادا کیا۔
دوسری جانب سعودی ولی عہد شہزادہ محمد بن سلمان بن عبدالعزیز نے بھی ٹیلیفون پر مقتول جمال خاشقجی کے بیٹے صلاح جمال خاشقجی اور ان عزیز و اقارب سے تعزیت کی۔
سعودی ولی عہد نے یقین دلایا کہ حکومت خاشقجی کے قتل میں ملوث عناصر کے ساتھ کوئی نرمی نہیں برتے گی بلکہ انہیں کٹہرے میں لایا جائے گاَ۔
یاد رہے کہ سعودی صحافی جمال خاشقجی کو 2 اکتوبر 2018 کو استنبول میں واقع سعودی قونصل خانے میں داخل ہونے کے بعد قتل کردیا گیا تھا۔
سعودی عرب کا کہنا ہے کہ جمال خاشقجی کی موت وہاں پر موجود افراد کے ساتھ لڑائی کا نتیجہ تھی تاہم ترک حکام اسے ایک سوچا سمجھا منصوبہ قرار دے رہے ہیں۔
