اسلام آباد: کنگ سلمان ریلیف سینٹر کی جانب سے پاکستان میں بڑے عوامی ترقیاتی منصوبوں کے لیے مشترکہ تعاون پروگراموں کا اعلان کیا گیا ہے۔
سعودی عرب کے فلاحی ادارے کنگ سلمان ہیومینٹیرین ایڈ اینڈ ریلیف سینٹر کی جانب سے پاکستان میں تعلیم، صحت، بحالی اور ترقیاتی منصوبوں اور خدماتی سہولتوں کے لیے تقریباً 4 ارب روپے مالیت کے مشترکہ تعاون پروگراموں اور عمل درآمدی معاہدوں پر دستخط کیے گئے۔
ان منصوبوں کے تحت نیشنل ڈیزاسٹر منیجمنٹ اتھارٹی کے لیے قدرتی آفات سے نمٹنے کی صلاحیت کو بہتر بنانے کے لیے ایک قومی لاجسٹک حب تعمیر کیا جائے گا، 2022 کے سیلاب سے بے گھر ہونے والے خاندانوں کے لیے خیبر پختونخوا اور پنجاب کے متاثرہ علاقوں میں 1 ہزار مستقل مکانات تعمیر کیے جائیں گے۔ ان میں سے ہر گھر میں دو کمرے، ایک باورچی خانہ اور ایک واش روم شامل ہوگا، تاکہ متاثرہ خاندانوں کو ایک باوقار اور محفوظ رہائشی ماحول فراہم کیا جا سکے۔
گلگت بلتستان، آزاد کشمیر اور بلوچستان کے پسماندہ علاقوں میں 300 کمیونٹی فیڈر اسکول تعمیر کیے جائیں گے، جو شمسی توانائی اور صاف پانی کی فراہمی سے آراستہ ہوں گے، ان اسکولوں سے تقریباً 15 ہزار بچے مستفید ہوں گے۔ آزاد کشمیر میں 2005 کے زلزلے سے متاثرہ 4 ہائی اسکولوں کی تعمیر نو بھی کی جائے گی۔
22 اہم منصوبوں کی تزئین و آرائش اور مرمت کی جائے گی، جن میں اسکول، صحت کے مراکز اور صاف پانی کے منصوبے شامل ہیں، ان منصوبوں سے تقریباً 3 لاکھ 60 ہزار افراد کو براہ راست اور 6 لاکھ 90 ہزار افراد کو بالواسطہ فائدہ ہوگا۔
واضح رہے کہ دستخط کی تقریب میں اسحاق ڈار، سعودی عرب کے سفیر برائے پاکستان نواف بن سعید المالکی، کنگ سلمان سینٹر کے انجنیئر احمد البائز اور یو این مشنز کے نمائندے بھی شریک تھے۔
