کراچی : کورنگی میں گزشتہ دنوں ہونے والے دو افراد کے قتل کا معاملہ سنگین صورتحال اختیار کرگیا، مقتولین ٹارگٹ کلنگ کا نشانہ بنے۔
تفصیلات کے مطابق کچھ روز قبل کراچی کے علاقے کورنگی میں دو افراد کے قتل کی تفتیش میں اہم پیشرفت ہوئی ہے، قتل کا معاملہ مبینہ طور پر ٹارگٹ کلنگ کا نکلا۔
واردات کے بعد ایس ایس پی کورنگی شاہ جہان خان بھی موقع پر پہنچ گئے، ان کا کہنا ہے کہ دو افراد کا قتل بظاہر دشمنی کا شاخسانہ لگ رہا ہے، جاں بحق ہونے والاایک مکینک دوسرا نامعلوم شخص ہے۔
ایس ایس پی کورنگی کے مطابق قتل ہونے والا شہری مکینک کے پاس کسی کام سے آیا تھا، اس دوران دو موٹرسائیکلوں پر سوار4 ملزمان مکینک کی دکان پر پہنچے۔
شاہ جہان خان کے مطابق ملزمان نے شہری کو فائرنگ کا نشانہ بنایا جس کی زد میں مکینک بھی آگیا، شبہ ہے ملزمان شہری کو ہی ٹارگٹ کرنے آئے تھے، مزید تفصیلات تفتیش کے بعد سامنے آسکیں گی۔
