کوٹ ادو: سنانواں میں تیز رفتار مسافر وین ٹرالی سے ٹکرانے کے بعد دکان میں گھس گئی جس کے نتجے میں 4 افراد جاں بحق ہوگئے۔
تفصیلات کے مطابق کوٹ ادو میں سنانواں کے قریب مسافر وین کو خوفناک حادثہ پیش آیا ہے جس کے نتیجے میں 4 افراد جاں بحق جبکہ 12 زخمی ہوگئے۔
ریسکیو حکام کا کہنا ہے کہ حادثے میں 12 سے زائد افراد شدید زخمی ہوئے ہیں جنہیں کوٹ ادو اور سنانواں اسپتال منتقل کر دیا گیا ہے لیکن زخمی افراد کی حالت انتہائی تشویشناک بتائی جارہی ہے۔
دوسری جانب ایک اور افسوسناک واقعہ کروڑ لعل عیسن میں 90 موڑکے قریب پیش آیا ہے جہاں ٹریکٹر ٹرالی اور موٹرسائیکل میں تصادم کے نتیجے میں دو بھائی جاں بحق ہوگئے۔
اس حوالے سے ریسکیو حکام کا کہنا ہے کہ حادثہ گنے سے لدی ٹریکٹر ٹرالی کے ساتھ موٹرسائیکل ٹکرانے کے باعث پیش آیا ہے جبکہ لاشوں کو قریبی اسپتال منتقل کردیا گیا ہے۔
