مسلم لیگ ن کے رہنما طلال چوہدری کی جانب سے کے پی حکومت پر 11 کروڑ کے بسکٹ کھانے کے الزام پر وزیراعلیٰ علی امین کا ردعمل بھی آ گیا۔
اے آر وائی نیوز کے مطابق مسلم لیگ کے مرکزی رہنما طلال چوہدری نے آج پریس کانفرنس میں خیبر پختونخوا میں کرپشن کا الزام عائد کرتے ہوئے یہ بھی کہا تھا کہ صوبائی حکومت نے صرف ساڑھے 11 کروڑ روپے بسکٹ کھانے میں ہی اڑا دیے۔
ن لیگی رہنما کے ان الزامات پر وزیراعلیٰ خیبر پختونخوا علی امین گنڈاپور نے جواب دیتے ہوئے کہا ہے کہ میں نے ساڑھے 11 کروڑ روپے کے بسکٹ نہیں کھائے، البتہ 400 کلاس فور ملازمین کو کھانا دیا۔
علی امین گنڈاپور نے کہا کہ اخراجات کیے ہیں تو 250 ارب روپے کی بچت بھی کی ہے۔ بیورو کریسی کو کنٹرول میں رکھنا سیاسی قیادت کا کام ہے اور یہ ہم کر کے دکھائیں گے۔
وزیراعلیٰ کے پی نے کہا کہ صوبے سے کرپشن مکمل ختم نہیں ہوئی، مگر ہم نے اسے کنٹرول ضرور کر لیا ہے۔ میں گزشتہ 12 سال نہیں، بلکہ صرف اپنے 15 ماہ کے دور حکومت کا حساب دینے کا پابند ہوں۔
