اسلام آباد: عدالت نے خیبر پختونخواہ ہاؤس کو فوری ڈی سیل کرنے کا حکم دے دیا ہے۔
تفصیلات کے مطابق اسلام آباد ہائیکورٹ کے چیف جسٹس عامر فاروق نے خیبر پختونخواہ ہاؤس کو سیل کرنے کے خلاف کے پی حکومت کی درخواست پر سماعت کی۔
سی ڈی اے کے وکیل نے کہا کہ غیر قانونی تعمیرات ہوئی ہیں، کچھ واجبات بھی باقی ہیں، چیف جسٹس نے استفسار کیا کہ سی ڈی اے نے اس پر نوٹس کب جاری کیے تھے؟ وکیل نے بتایا کے پی ہاؤس کی لیز 2014 میں ختم ہو چکی ہے، 2014 میں ہی پہلا نوٹس دیا گیا تھا۔
چیف جسٹس نے کہا ایک نوٹس ہاؤس سیل کرنے سے پہلے بھی جاری کر دینا تھا نا، اگر کچھ ہے تو نوٹس کریں وہ اس کو دیکھ لیں گے، آپ قانون قاعدے کے مطابق یہ کر سکتے ہیں۔ جسٹس عامر فاروق نے کہا اس طرح نہ کریں کہ لگے آپ کسی کو ٹارگٹ کر رہے ہیں، یہ ایک صوبے کا ہاؤس ہے، سیل کرنا شرمندگی والا کام ہے۔
چیف جسٹس نے کہا میں خیبر پختونخوا ہاؤس کو ڈی سیل کرنے کا آرڈر کر رہا ہوں، جس کے بعد عدالت نے سی ڈی اے کے بلڈنگ ڈپارٹمنٹ کو کے پی ہاؤس ڈی سیل کرنے کے احکامات جاری کر دیے۔
عدالت نے سی ڈی اے وکیل کو کہا کہ آج ہی آرڈر پاس کر دوں گا آپ ڈی سیل کر دیں۔
