ممبئی: معروف بالی وڈ اداکارہ کریتی سینن کی رواں سال ان کے مبینہ بزنس مین بوائے فرینڈ کبیر باہیا سے شادی کی تیاریوں کے حوالے سے افواہیں زیرِ گردش ہیں۔
انڈین میڈیا کی رپورٹس کے مطابق کریتی سینن فی الحال فلمساز آنند ایل رائے کی فلم ’تیرے عشق میں‘ کی شوٹنگ میں مصروف ہیں اور اس کے فوری بعد ممکنہ طور پر ’کاک ٹیل 2‘ کی تیاری شروع کریں گی۔
اداکارہ سے منسلک ذرائع نے بتایا کہ ’کریتی سینن کے پاس شادی کیلیے اس سال وقت کہاں ہے؟ وہ اس وقت دہلی میں ہیں اور ان کی پوری توجہ آنند ایل رائے کی فلم کی شوٹنگ پر ہے، اس سے فارغ ہو کر وہ اگلے پروجیکٹ میں مصروف ہو جائیں گی‘۔
یہ بھی پڑھیں: ایسا ہمسفر چاہیے جس سے گھنٹوں باتیں کر سکوں اور وہ مجھے ہنسائے، کریتی سینن
ذرائع نے مزید بتایا کہ کریتی سینن ’تیرے عشق میں‘ میں ’مکتی‘ کے کردار کو زندہ کریں گی، وہ اس حوالے سے بہت محنت کر رہی ہیں۔
چند روز قبل کریتی سینن اور کبیر باہیا کی وائرل ویڈیو نے جوڑے کی جلد شادی کی افواہوں کو جنم دیا تھا، دونوں ایک ساتھ دہلی ایئرپورٹ پر موجود تھے۔
ایئرپورٹ پر شناخت چھپانے کیلیے اداکارہ نے ٹوپی، چشمہ اور چہرے پر ماسک لگایا تھا جبکہ کبیر باہیا سیاہ رنگ کی ٹی شرٹ اور پینٹ میں نظر آئے۔
شادی کی افواہوں کی ایک وجہ دونوں کے والدین کا بیک وقت دہلی میں ہونا بھی تھا۔ رپورٹس میں بتایا گیا تھا کہ انہوں نے مبینہ بوائے فرینڈ کے والدین سے ملاقات کی اور سال 2025 کے آخر تک شادی ہونا طے پائی ہے لیکن اس کی تصدیق کہیں سے نہیں ہو سکی تھی۔
کریتی سینن اور کبیر باہیا کو کئی تقریبات میں پہلے بھی ایک ساتھ دیکھا جا چکا ہے۔ کچھ دن قبل مداحوں نے انہیں بنگلورو میں ایک شادی میں دیکھا تھا جہاں وہ ایک جیسے لباس میں ملبوس محور گفتگو تھے۔
کبیر باہیا ورلڈ وائیڈ ایوی ایشن اینڈ ٹورازم لمیٹڈ کے بانی ہیں اور ان کے والد ساوتھ ہال ٹریول کے مالک ہیں جو برطانیہ میں مقیم ایک ممتاز ٹریول ایجنسی ہے۔
