The news is by your side.

Advertisement

کورونا وائرس : کویت میں صورتحال تشویشناک، حکومت نے اہم فیصلے کرلیے

کویت سٹی : کورونا وائرس کی بڑھتی ہوئی تباہی کے پیش نظر کویتی حکومت نے اہم فیصلے کرلیے، وزیر صحت کی جانب سے پیش کی گئی نئی رپورٹ کے بعد ہنگامی اقدامات ناگزیر ہوگئے۔

کویت کے باخبر ذرائع کی رپورٹ کے مطابق وزیر اعظم شیخ صباح الخالد کی سربراہی میں وزراء کی کونسل کا ہفتہ وار اجلاس طلب کیا گیا۔

اجلاس میں وزیر صحت نے کابینہ کو صحت سے متعلق اہم رپورٹ پیش کردی، کابینہ نے علاقائی اور بین الاقوامی سطح پر کورونا وائرس سے متعلق تازہ ترین پیشرفت کے بارے میں کویت وزیر صحت کی جانب سے فراہم کردہ وضاحت کو بغور سنا۔

اس کے علاوہ کورونا اعداد و شمار کی بنیاد پر ملک میں صحت کی صورتحال کی پیشرفت کے علاوہ انفیکشن، اموات اور شدید نگہداشت میں زیر علاج مریضوں اور ان کی صحتیابی کی شرح میں کمی کے ساتھ معاملات میں اضافہ دیکھنے میں آرہا ہے۔

اجلاس میں بتایا گیا کہ ملک میں کورونا وائرس کے مثبت نتائج کی فیصد میں تیزی سے اضافہ ہورہا ہے جو ایک خطرناک صورتحال ہے جس سے ظاہر ہوتا ہے کہ بیماری کا پھیلاؤ دن بہ دن بڑھتا جارہا ہے۔

وزراء کونسل نے کورونا وائرس کے خلاف ویکسی نیشن مہم کے نتائج کا بھی نوٹس لیا، سسٹم میں رجسٹرڈ تمام افراد 65سال یا اس سے زیادہ عمر کے شہریوں اور رہائشیوں کو ویکسین دی جا چکی ہے اور ان لوگوں کو ویکسین دینےکے بعد ریاست کویت میں ویکسین حاصل کرنے والے افراد کی کل تعداد 322،000 تک جا پہنچی ہے۔

کابینہ نے تمام شہریوں اور رہائشیوں سے تعاون جاری رکھنے اور صحت کے تقاضوں اور احتیاطی تدابیر پر عمل پیرا ہونے کا مطالبہ کیا تاکہ اس آزمائش سے بہترین نتائج کے ساتھ نکل سکیں۔

اس کے علاوہ کابینہ نے کورونا وائرس کی ہنگامی صورتحال کے لئے وزارتی کمیٹی کی سفارشات کا بھی مطالعہ کیا اور ان سے متعلق متعدد فیصلے کیے۔

Comments

یہ بھی پڑھیں