دبئی: کویت میں کرپٹو کرنسی فراڈ کی ایک نئی لہر آئی ہے، جس کے باعث سرمایہ کار 40 ملین کویتی دینار (130 ملین ڈالرز) ڈوب گئے۔
یہ کویت کی ڈیجیٹل ٹریڈنگ کی تاریخ میں سب سے بڑا فراڈ ہے، نئی متعارف کرائی گئی کریپٹو کرنسی ’’بِٹ کوائن کویت‘‘ کے نام پر لوگوں کو بڑا دھوکا دیا گیا اور صرف چند گھنٹوں میں 40 ملین کویتی دینار غائب ہوگئے جس پر سرمایہ کار حیران و پریشان رہ گئے۔
تاجروں نے اس ’بٹ کوائن کویت‘ نامی کرپٹو کرنسی میں بہت زیادہ سرمایہ کاری کی تھی، تاہم وہ آغاز کے فوراً بعد ہی سرمایہ کاروں کو لے ڈوبی۔
یہ اسکیم، مبینہ طور پر ایک گمنام ڈیولپر کی طرف سے تین سالوں میں ترتیب دی گئی تھی، سب سے پہلے کویت یونیورسٹی میں کمپیوٹر سائنس کی پروفیسر اور کویت سوسائٹی فار انفارمیشن سیکیورٹی کی صدر ڈاکٹر صفا زمان نے اس کا پردہ فاش کیا۔
ڈاکٹر صفا زمان نے سوشل میڈیا پلیٹ فارم ایکس پر انکشاف کیا کہ ’بِٹ کوائن کویت‘ کا خالق فنڈز کے ساتھ غائب ہو گیا، اور اپنے پیچھے بہت سے متاثرین کو چھوڑ گیا ہے۔
فراڈ کا شکار ہونے والوں میں زیادہ تر نوجوان اور ناتجربہ کار سرمایہ کار تھے، انھوں نے سوال کیا کہ چیزوں کی نگرانی کہاں ہے، قانون سازی کہاں ہے، اور دھوکہ باز کہاں ہے؟
ڈاکٹر صفا زمان نے ایک کویتی انجینئر کے حوالے سے بتایا کہ اس نے ایک جعلی ڈیجیٹل ٹریڈنگ اسکیم میں تقریباً 3 لاکھ کویتی دینار (975,000 ڈالرز) کھو دیے، جس کے باعث وہ اپنے زیادہ تر اثاثوں کو فروخت کرنے پر مجبور ہوا۔
