کویت : کویت کی جنرل ٹریفک ڈیپارٹمنٹ نے ڈلیوری کرنے والے موٹرسائیکل سواروں کو 3 اکتوبر سے شاہراہوں اور مرکزی سڑکوں پر بائیک چلانے سے روک دیا۔
تفصیلات کے مطابق کویت فیڈریشن فار ہوم ڈلیوری سروسز کمپنیوں کے سربراہ ابراہیم عبداللہ التویجری نے کہا ہے کہ جنرل ٹریفک ڈیپارٹمنٹ 3 اکتوبر سے ہوم ڈلیوری سروس موٹر سائیکلوں کو رِنگ روڈ اور شاہراہوں پر ڈرائیو کرنے سے روک دے گا۔
ساتھ ہی انہوں نے جنرل ٹریفک ڈیپارٹمنٹ کی جانب سے لئے گئے اس فیصلے کی تعریف کرتے ہوئے کہا کہ ڈرائیوروں اور سڑک استعمال کرنے والوں کے بہترین مفادات اور حفاظت کیلئے یہ ایک اچھا فیصلہ ہے۔
التویجری نے میڈیا کو دیئے گئے ایک بیان میں کہا کہ اسسٹنٹ انڈر سیکرٹری برائے ٹریفک اور آپریشن امور ، میجر جنرل جمال السایغ نے فیڈریشن کو آگاہ کیا ہے کہ جنرل ٹریفک ڈیپارٹمنٹ ان علاقوں اور مرکزی سڑکوں کا تعین کرے گا جہاں یہ ڈلیوری کرنے والے موٹرسائیکل سوار آرڈر دے سکتے ہیں۔
انہوں نے السایغ کے اس فیصلے کی بھی تعریف کی جو ملک، شہریوں اور ڈلیوری کمپنیوں کے مفاد میں لیا گیا ہے،انہوں نے کہا کہ ہوم ڈلیوری موٹر بائیک مقررہ شاہراہوں پر نہیں چل سکتیں۔
التویجری نے وضاحت کی کہ جنرل ٹریفک ڈیپارٹمنٹ نے علاقوں اور چوراہوں میں چلنے والے موٹر سوار کے لئے مخصوص علاقوں کی بھی وضاحت کی ہے۔ انہوں نے اشارہ کیا کہ جنرل ٹریفک ڈیپارٹمنٹ نے موٹر سائیکل سواروں کو خبردار کیا ہے کہ وہ ہدایات کی پابندی کریں۔
انہوں نے مزید کہا کہ موٹر سائیکل کے پچھلے حصے میں ڈلیوری باکس میں اندھیرے میں روشن ہونے والی سیفٹی پٹی (عکاس روشنی کی پٹی) ہونی چاہیے، سوار کو ہیلمٹ پہننا ضروری ہو گا اور موٹرسائیکل ڈرائیونگ لائسنس لازمی ہونا چاہیے۔
