لالیگا : لائنل میسی کی بارسلونا نے لالیگا فٹبال لیگ میں سنسنی خیز مقابلے کے بعد ریال سوسیداد کو دو کے مقابلے تین گول سے شکست دے دی، میسی نےدو گول اسکورکیے۔
تفصیلات کے مطابق اسپینش لا لیگا لیگ میں ایک بار پھر لائنل میسی کا جادو چل گیا۔ ٹائٹل کی دوڑ میں امیدیں برقرار رکھنے کیلئے میسی کی بارسلونا کو ریال سوسیداد کےخلاف میچ جیتنا ضروری تھا، 17 ویں منٹ میسی نےگیند کو جال میں پھینک دیا۔
پہلےہاف کے37 ویں منٹ میں میسی نے ایک اور گول داغ دیا۔ حریف ٹیم نے کم بیک کیا اور گول اسکور کرکے خسارہ ایک گول کم کردیا۔
کھیل کے چوالیسویں منٹ میں بارسلونا نے تیسری بارگیند کو جال میں پہنچایا۔ پہلے ہاف کےاختتامی لمحات میں ریال سوسیداد نےایک اور گول اسکور کرکے برتری کو کم کیا۔
پہلےہاف میں بارسلونا کو تین دو کی برتری حاصل تھی تاہم دوسرے ہاف میں دونوں ٹیموں نے گول اسکور کرنے کی کوشش کی لیکن کامیابی نہ مل سکی۔ بارسلونا نےمیچ تین دو جیت کر دوسری پوزیشن مستحکم کرلی۔
