ماہ رمضان الوادعی جمعہ کے ساتھ اپنی آخری ساعتوں میں داخل ہوچکا ہے تو کیوں نہ اس مقدس مہینے کی روحانی یادوں کو محفوظ کرلیا جائے۔
آج کے افطار کیلئے ہم آپ کو مزے دار ’لب شیریں‘ بنانے کی ترکیب بتائیں گے جسے کھا کر آپ کے اہل خانہ آپ کی تعریف کیے بغیر رہ نہیں سکیں گے۔
اجزاء:
مزیدار لبِ شیریں کی تیاری میں جن اجزاء کی ضرورت ہے ان میں دودھ آدھا لیٹر، چینی 2 کپ، فریش کریم 1 کپ، ونیلا کسٹرڈ یا کارن فلور 3 کھانے کے چمچے، لال جیلی 1 پیکٹ۔
اس کے علاوہ پیلی جیلی 1 پیکٹ، ہری جیلی 1 پیکٹ، ابلی رنگین سوئیاں 1 کپ، آم 2 عدد، کیلے 4 عدد، سیب 3 عدد، انگور 1 کپ، آڑو 1 عدد، پستے، بادام 1 کپ شامل ہیں۔
ترکیب:
ونیلا کسٹرڈ یا کارن فلور کو تھوڑے سے پانی یا پھر ٹھنڈے دودھ میں گھول لیں اب دیگچی میں دودھ اور چینی ڈال کے اُبلنے کے لیے رکھ دیں۔
جب چینی اچھی طرح حل ہو جائے تو اس میں پہلے سے حل شدہ کارن فلور یا پھر ونیلا کسٹرڈ کو اس گرم دودھ کے مکسچر میں شامل کرلیں اور اس دوران مسلسل چمچہ چلاتی رہیں کہ کسٹرڈ گاڑھا ہوجائے۔
اب اس کو ٹھنڈا کرلیں اور تھوڑا سا کسٹرڈ پیالے میں نکالیں پھر اس میں کریم مکس کریں اور اس مکسچر کو فریج میں رکھ دیں۔
اب جیلی کو پکا کے جمالیں اور جمنے کے بعد کیوب کی شکل میں کاٹ لیں، سارے پھلوں کو بھی چھیل کر کیوب کی شکل میں کاٹ لیں۔
پھر ایک پیالے میں سارے پھل، جیلی، رنگین اُبلی ہوئی سویاں ڈال کے اوپر کسٹرڈ ڈال دیں۔ اسے پستے، بادام سے سجا کے ٹھنڈا کرکے دسترخوان پر سجائیں۔
